Tulo ka gradwado sa USC top sa CPA board

CEBU, Philippines — Tulo ka gradwado sa University of San Carlos (USC) nakasulod isip topnotchers sa 2024 Certified Public Accountant (CPA) board exam.

Si Jianne Ilysse Dy Yu, 21-anyos, taga Guadalupe, Cebu City, maoy naka-secure sa top 1 spot sa maong nationwide licensure exam nga adunay rating nga 89.67 porsyento.

Samtang ang laing duha kinsa mga estudyante usab sa USC nga sila si Kristina Noelle Odal Vistal, 23-anyos, nagpuyo sa Lilo-an, Cebu maoy top 8 nga dunay rating nga 88 porsyento ug si Jeliel Miguel Bolido, 22-anyos, taga sa Negros Oriental nakakuha sa ika-10 nga pwesto og dunay rating nga 87.67 porsyento.

Si Yu nibalik og lantaw sa mga hagit nga ug kalisdanan nga iyang nasinati lakip na niini ang nikuyanap nga pandemiya nga nakapahimo niyang lig-on aron makawhat ang kalamposan.

Ang iyang dakong kalamposan gipahinungod niya kini ngadto sa iyang mga ginikanan, magtutudlo, co-reviewers ug uban pa nga kanunay’ng nisuporta kaniya sukad sa iyang pagsugod, pag-review hangtud nga nahimo siyang topnotcher.

Sa iyang bahin, si Vistal sama ni Yu nipadayag og dakong pasalamat ngadto sa iyang pamilya, mga mentor ug mga higala alang sa ilang suporta sa tibuok niyang panaw ngadto sa pagkahimong usa ka top CPA.

Matud ni Vistal nga wala siya nagdahom nga mahimong topnotcher tungod kay sa sinugdanan alang kaniya imposible kini apan iya kining nakab-ot tungod sa gugma ug pagdasig nga gihatag sa mga tawo sa iyang palibot.

Sama ni Vistal, si Bolido wala usab niya damha nga mahimong top CPA tungod kay nag-focus lang siya sa pagpasar sa maong pasulit apan pinaagi sa kalig-on ug kakugi, nakab-ot niya ang kalamposan.

Silang tulo nagpasalamat usab sa Ginoo niining dakong kalamposan tungod kay nituo sila nga kining tanan dili mahitabo ug makawang lamang ang ilang kahago kon dili tungod sa Ginoo.

Sa laing bahin, plano sa tulo ka topnotcher nga sa umaabot mosulod og audit firm ug mag-public practice.

 Nagplano usab sila nga ipadayon ang ilang pagtuon aron mapalambo pa ang ilang kahibalo ug kahanas sa ilang gipili nga profession.

Sa kinatibuk-an 76.40 porsyento ang passing rate sa USC alang sa mga first time takers.

Sa tibuok nasud, niabot sa 3,O58 sa 10,136 ka examinees ang malampusong nakapasar sa board exam diin 30.17 porsyento kini sa national passing rate. (BANAT NEWS)