Kaso sa dengue gilauman nga hingpit na nga mokunhod
CEBU, Philippines — Gikalipay si Cebu City Mayor Raymond Alvin Garcia ang pagkunhod sa kaso sa dengue sa Dakbayan sa Sugbo bisan pa man og padayon ang pag-uwan-uwan.
Gipakita ni Garcia ang datus gikan sa City Health Department sukad pa niadtong Enero 1 hangtud na sa Disyembre 7 ning tuiga.
Matud pa ni Garcia nga nagbunga ra gyud ang gihimo nga mga lakang sa siyudad aron batukan ang dengue ilabi na ang pagtinabangay ug pagkooperar sa mga hingtungdan nga dako og tabang nga maminusan ang kaso sa dengue.
“It has reduced dramatically from the time nga nag-intervene ta…. You see, nindot na kaayo kay nanaug na gyud. I would like to commend our City Health Department as well as our barangay employees nga nitabang sa atong intervention ug nanaug gyud ang cases of dengue. So, thank you very much sa barangay ug sa City Health Department ug ang ubang mga kawani sa City Hall who took part in making an effort nga ma-reduce ang atoang dengue cases,” padayag pa ni Garcia.
Base sa datus sa CHD ang syudad mitala og 4,132 ka kaso sa dengue diin kasagaran sa mga nataptan mao ang nagpangidaron ngadto sa 1-10 anyos nga may 1,923 ka mga kaso ug gisundan kini sa 11-20 anyos, nga niabot sa 1,115 ka mga kaso. Samtang 21 ka mga indibidwal ang nakalas tungod sa maong sakit.
Niadtong Agosto 25 hangtud 31 niining tuiga, nakatala ang siyudad ug labing taas nga kaso sa dengue diin miabot kini ngadto sa 292 ka kaso.
Apan inanay na kini nga nikunhod hangtud nga karong December 1-7,2024 natala nalang sa 15 ka kaso ang syudad ug walay nay namatay. (BANAT NEWS)
- Latest
