Most wanted nadakpan
CEBU, Philippines — Human sa taud-taod nga pagtago-tago wala na makaipsot gikan sa mga kamot sa kapulisan ang most wanted person sa Argao nga si Jonathan Comaling human kini nadakpan sa Criminal Investigation and Detection Group (CIDG) Cebu Provincial Field Unit dihang gi-serve iyahang warrant of arrest sa Holy Family Road, Barangay Busay, Siyudad sa Sugbo, kagahapon sa kaadlawon, Martes, Disyembre 17, 2024.
Si Jonathan Comaling, 33 anyos, minyo ug nagpuyo sa Barangay Jampang, Lungsod sa Argao. Giingon nga ang akusado miyembro sa Amancio Criminal Gang ubos sa COPLAN AMANCIO nga nag-operate sa Districts 3, 5, 7 sa Cebu Province apil ang Cebu City.
Gani, sa miaging semana ang kapulisan sa Lungsod sa Argao ni-serve sab sa warrant of arrest batok sa akusado apan ang mga kauban ni Comaling giingong misukol ug nahitabo ang engkwentro ug nakaikyas matud pa si Jonathan.
Natultolan sa kapulisan ang gitaguan ni Comaling hinungdan nga gi-serve sa CIDG Cebu Provincial Field Unit ang warrant of arrest sa kasong kalapasan sa Section 28 (a) in relation to Section 28 (e) sa Republic Act 10591 gikan ni Judge Francis Rainer R. Navarrete, Presiding Judge, 7th Judicial Region, Municipal Trial Court Branch 93, Argao, Cebu ang nag-issue penetsahan May 24, 2024 ug dunay piyansa nga girekomendar nga P120, 000.
Atol sa pag serve sa warrant of arrest na recover sa kapulisan ang usa ka kalibre .45 nga armas, usa ka magazine tulo ka bala sa kalibre .45, usa ka KG9 Sub Machine Pistol ug magazine, 19 ka bala sa .9mm nga armas ug usa ka AR 15 Sub Machine Gun Rifle ug magazine.
Na recover sab sa kapulisan ang usa ka itom nga Mitsubishi Mirage Gen 4 nga itom nga iya sa akusado. Dihang gi-body search ang akusado nakuhaan kini og upat ka medium size nga putos sa shabu.
Si Jonathan Comaling sa iyang bahin miangkon nga iyaha ang mga armas ug wala kini lisensiya sanglit sa Danao niya kini napalit. Nagtinir matud pa siya sa maong mga armas kay koleksyon matud pa niya ug iyaha kini pinalit sa Danao.
Gawas sa unang kaso niini, mag-atubang og laing kasong kalapasan sa Republic Act 10591 ug Republic Act 9165 ang suspetsado. (BANAT NEWS)
- Latest
