P4M shabu nasakmit sa tulo ka operasyon

CEBU, Philippines — Miabot sa kapin P4 milyones nga ilegal nga drugas ang nasakmit sa tulo ka managlahing anti-illegal drugs operations sa kapolisan ug sa PDEA-7, usa kanila usa ka e-bike drayber diha sa Purok Sambag, Barangay San Roque, Dakbayan sa Talisay kagahapon sa tungang gabie.

Ang dinakpan mao si Ruel Rafanan Bazar, 41,nagpuyo sa nahisgutang lugar. Si Police Lt. Col. Epream Paguyod, hepe sa kapolisan sa Talisay nibutyag nga si Bazar usa ka High Value Individual (HVI) sa pagbaligya og ginadiling drugas.

Sa ilang pagpaniid sa ilegal nga kalihukan ni Bazar yano lang kini nga makabaligya og kinilo nga ilegal nga drugas. Gihimo nila ang buy bust operation batok sa dinakpan hangtud nga nahimo kini nga positibo.

Nakuha gikan kaniya ang 325 gramos nga ilegal nga drugas nga adunay balor nga P2,550,000.

Sa laing operasyon, nasakmit sa mga operatiba sa Regional Police Drug Enforcement Unit sa Police Regional Office-7 ang kapin sa usa ka milyon ka pesos nga balor sa illegal nga drugas sa ilang buy-bust operation sa F. Cabahug Street, Barangay Mabolo, siyudad sa Sugbo, Lunes sa gabii, Disyembre 16, 2024.

Nadakpan ang subject sa buy-bust operation nga si Philip Anthony Guylan Coral alyas Anton, 27, nagpuyo sa Jose Abad Santos, Barangay Cayang, Dakbayan sa Bogo, Probinsiya sa Sugbo.  Nasakmit sa mga operatiba ang 205 gramos nga shabu nga nagkantidad og P1.3 million.

Sa impormasyon sa kapulisan, ang suspetsado bodegero matod pa sa illegal nga drugas. Giingong maka dispose ang suspetsado og 500 grams nga shabu kada semana ug ang area of operations niini kay Cebu City ug Probinsya sa Sugbo.

Laing nadakpan sa mga operatiba sa Philippine Drug Enforcement Agency (PDEA)-7 ug Cebu City Police Office Station 10 Drug Enforcement Unit ang usa ka high-value target sa ilang buy-bust operation sa Sitio Sto. Niño, Barangay Quiot, siyudad sa Sugbo, Lunes sa hapon.

Ang suspek mao si alyas Rasan, 41, residente sa naasoy nga dapit ug nakombiktp niadtong 2014 sa kasong kalapasan sa Republic Act 9165.

Nasakmit sa mga operatiba a g 19 ka putos sa gituohang shabu nga nitimbang og 52 gramos ug nagkantidad og P353,600, buy-bust money, kwarta nga P527 ug nagkalain-laing drug paraphernalia nga gigamit sa pag repack og shabu 

Ang maong operasyon resulta kini sa impormasyon nga nadawat sa kapulisan gikan sa concerned citizen. Nasuta nga maka dispose ang suspek ug 50 gramos nga shabu kada semana.

Kasong kalapasan sa Section 5, 11 ug 12, Article II sa Republic Act 9165 ang ipasaka batok sa mga suspek. (BANAT NEWS)