Mi-overheat nga electric fan hinungdan sa sunog sa Talisay

CEBU, Philippines — Usa ka electric fan nga mi overheat ang gitan-aw karon nga maoy hinungdan sa sunog sa sitio Rattan, Barangay Tanke, Dakbayan sa Talisay niadtong Lunes sa hapon  alas 3:46 sa hapon ug giisa sa first alarm alas 3:50 sa mga kabumberorahan sa Talisay.

Nag-una nga nakaresponde ang penetrator sa Barangay Tanke hinungdan nga wala makahunat ang kayo sa uban nga panimay. Gitiwasan sa kabumberohan sa Talisay ang pagpawong sa kayo hangtud nga ila kining nakontrolar sa alas 4:05 sa hapon ug gideklarar  nga fire out alas 4:12 sa hapon.

Si Raynel Juezan, niingon nga wala siya didto sa ilaha sa dihang nahitabo ang sunog apan ang iyang asawa nga maoy nitug-an kaniya nga wala pa kini 10 minuyos misulod sa banyo aron unta maligo nisilaob na ilang balay.

Nagkanayon si Juezan nga wala na gyud silay nadala o nasalbar nga butang pero bisan paman niini nagpasalamat lang siya kay walay naunsa sa iyang pamilya. Siya nitataw nga natulog ang iyang bata maayo gani kay nakamata kini og nipalayo sa nasunog nila nga panimay.

Si FO1 Jerome Dalauta, imbistigador sa Talisay City Fire Station niingon nga niabot sa P240mil ka pesos ang danyos sa sunog.  Ilang gitan-aw ang pag overheat sa electric fan nga maoy sinugdanan sa sunog.

Ang apektado nga pamilya gipakaon na sa City Social Welfare and Development (CSWD) samtang giproseso ang pinansyal nga ayuda nga ilang madawat. (BANAT NEWS)