Konseho giawhag nga dalion ang pag-aprobar sa budget

CEBU, Philippines — Tungod kay pipila nalang ka semana ang nahabilin sa tuig, si Cebu City Mayor Raymond Alvin Garcia niawhag sa konseho sa dakbayan nga paspasan ang pag-aprobar sa P17.9 bilyones nga gisugyot nga annual budget ug miingon nga positibo siya nga dili kini kuhaan dili sama sa miaging tuig.

Bisan pa nga ang P17 bilyon nga gisugyot nga budget alang sa 2025 miagi na sa usa ka marathon budget hearing, wala pa kini pormal nga gi hisgotan sa Konseho sa siyudad.

Hinuon si Garcia niingon nga importante nga maaprobahan dayon ang budget, kay duna kini importante nga mga budgetary allocations, nga mao ang budget alang sa Sinulog 2025 celebration, nga mahitabo sa buwan sa Enero.

Dugang pa niya nga tungod kay mahulog ang Sinulog sa unang buwan sa tuig, importante nga maaprobahan ang tinuig nga budget aron ma-release ang mga subsidy sa mga contingents.

“Siyempre kinahanglan ta mogasto para sa allowances, mogasto pa gani ta sa mga packed meals, kadaghang police nga atong pakan-on para sa Sinulog Day, etcetera, so we need the budget to be approve para ma-process in advance,” matud ni Garcia.

Kaniadto, si Konsehal Noel Wenceslao, Chairman sa Committee on Budget and Finance, nipadayag nga base sa budget hearing, adunay posibilidad nga makuhaan ang proposed budget tungod sa way klaro nga tinubdan sa pundo.

Hinuon, si Garcia, sa samang pakighinabi kagahapon, niingon nga ang konseho sa dakbayan mi-aprobar sa P50 bilyones nga budget sa 2023 ug gipamub-an ang P100 bilyones nga gisugyot nga tinuig nga budget ngadto sa P25 bilyon.

Sa lain nga pakighinabi, si Wenceslao miingon nga bisan giandam na ang committee report sa ilang bahin, pipila ka mga items ang giamendahan sa Cebu City Budget Office tungod sa mga sayop.

Ang pipila ka mga pag-amendar gihimo sa pagsusi, tungod kay ang ubang mga kantidad nakit-an nga mas taas kaysa sa nabutang sa Annual Investment Plan (AIP).

Matod ni Wenceslao, ang maong sugyot iapil na unta sa agenda niadtong Biyernes.

Aron mapadali ang proseso, si Wenceslao niingon nga posibleng kinahanglang mohimo sila og special session, bisan og wala pay konkretong petsa. (BANAT NEWS)