Land   gipirmahan  sa siyudad ug DOH-7

CEBU, Philippines — Human sa onse ka tuig, pormal na nga gipirmahan sa Cebu City Government ug Department of Health (DOH)-7 ang kasabotan sa land-swap agreement alang sa duha ka ektarya nga luna nga ibaylo sa Cauit Island.

Kagahapon, gipirmahan ni Cebu City Mayor Raymond Alvin Garcia ug DOH-7 Regional Director Jaime Bernadas ang deed of donation aron pormal na nga mamahimo ang land-swap agreement.

Gipasabot ni Garcia nga ang Cauit Island, sa wala pa kini gi-reclaim, gipanag-iya sa DOH, diin gigamit kini isip Quarantine Center. Human niini, gibawi sa dakbayan sa Sugbo ang labing minos 295 ka ektarya nga yuta sa South Road Properties (SRP), lakip ang Cauit Island. Dugang niya nga ang dapit nga gibarogan sa NuStar bahin usab sa Cauit Island. Tungod niini, nasabotan ang pagbalhin sa pagpanag-iya sa Cauit Island ngadto sa dakbayan sa Sugbo apan dapat bayloan sa duha ka ektarya nga luna.

“Dugay na kaayo ni, 2013… sa side sad sa Cebu City Government, nanguha man gani tag yuta atong bayran in exchange, kay in good faith baya ang DOH nga ila gyud gihatag nato, nya dili ta mutupad sa atong gi saad nila nga tagaan nato sila og two hectares,” matod ni Garcia.

Matod ni Bernadas, ang Cauit Island nagsilbi nga Bureau of Quarantine sa DOH.

Dugang pa niya nga adunay Memorandum of Understanding (MOU) niadtong 2010 tali ni kanhi Secretary Francisco Duque III ug kanhi Mayor Tomas Osmeña, nga maoy hinungdan sa land-swap deal.

Ang duha ka ektarya nga luna nahimutang sa daplin sa South Road Properties (SRP), tapad sa Department of General Services (DGS) Office.

Matod ni Bernadas nga nagpadayon ang pagtukod sa ilang DOH building sa duha ka ektarya nga luna. Ang challenges nga ilang giatubang mao ang pag formalize sa pagbalhin sa pagpanag-iya ngadto sa DOH.

Matod ni Bernadas, ang unang edipisyo nga nahuman sa samang dapit mao ang National Blood Center, nga nag-operate na ug nagserbisyo sa nagkadaiyang lungsod.

Ang ikaduhang building, nga duha ka andana, 2,000 metro kuwadrado nga estruktura, padayon pa nga gitukod.  Ang ikaduhang edipisyo magsilbi nga relocation site sa buhatan sa DOH-7, uban sa mga support facilities, lakip na ang mga laboratory.

Kon mamahimo na ang pagbalhin, hingpit nang mabakante ang kasamtangang buhatan sa DOH-7 duol sa Vicente Sotto Memorial Medical Center (VSMMC) sa Osmeña Boulevard. Matud usab ni Bernadas nga sa higayon nga mobalhin na sila, magsugod na ang expansion sa VSMMC—usa ka aksyon nga dugay na nga gimando nga buhaton sukad niadtong 2018. (BANAT NEWS)