Unang adlaw sa Misa de Gallo gidagsa sa mga tawo

CEBU, Philippines — Gidagsa og daghang manimbahay ang St. Francis Xavier Parish sa lungsod sa Alegria sa unang adlaw sa Misa de Gallo kagahapon, adlaw nga Lunes Disyembre 16 nga gipangunahan ni Archbishop Jose Palma sa Archdiocese of Cebu.

Uban sa arsobispo ang mga kaparian sa Archdiocese of Cebu nga gitambongan sa bagang duot sa katawhan nga magtutuo.

Atol sa homiliya, ang  Arsobispo mipahinumdom sa mga magtutuo nga magmatinud-anon sa ilang pagtuo ug pag-abli sa ilang kasingkasing sa pagdawat sa Ginoo. Ang arsobispo nipadayag nga bisan sa panahon sa mga pagsulay ug kabalaka iyang gidasig ang tanan sa pagpaduol sa Ginoo ug mosalig sa makanunayon nga presensya niini.

Human sa Santos nga misa nagpahigayon usab ang arsobispo sa blessing sa belfry nga naguba panahon sa bagyong Odette nga gitambongan sa mga opisyal sa lungsod ug mga magtutuo.

Sa pikas bahin, gihulagway sa kapolisan nga malinawon ug hapsay ang pagsugat sa unang Misa de Gallo dinhi sa Metro Cebu.

Si Police Lieutenant Colonel Maria Theresa Macatangay, Deputy City Director for Operations ug tigpamaba sa Cebu City Police Office nagkanayon nga gikan sa alas 3 sa kadlawon hantod sa alas 6 sa buntag kagahapon wala sila'y nadawat nga report sa bisan unsa nga crime incidents.

"There is no problem sa atoang existing deployment karon and base in the result I think everything is right on the spot nga in accordance sa atoang deployment," sigon ni Macatangay.

Nasayran nga 500 ka mga police ang gipakatap sa CCPO sa 33 ka mga simbahan sa siyudad.

Samtang si Police Captain Eden Rex Baguio, tigpamaba sa Cebu Police Provincial Office mibutyag nga 72 ka mga simbahan ang sa Probinsya sa Sugbo ang dunay Misa de Gallo, wala sab sila'y natala nga insidente sa unang Misa de Gallo.

Sama sa gipaabot, gidagsa sa mga manimbahay ang tanang mga simbahang Romano Katoliko sa Sugbu timaan sa pagsugod na sa nobenaryo hangtud sa adlaw sa Pasko, Disyembre 25.

Gawas sa mga nanimba, daghan sab ang mga nangbutho nga mga namaligya og mga puto-sikwate, budbod pilit ug balanghoy, biko, kakanin, kutsinta, taho, kape, gatas ug daghan pang uban.

Makita sab ang daghang mga polis ug mga barangay tanod uban sa mga anti-crime volunteers nga nagbantay sa palibot samtang ang kadalanan gibantayan sab og daghang mga traffic enforcers alang sa pagdumala sa trapiko. Decemay P. Padilla, Romeo Limpangog (BANAT NEWS)