Motor nisarasay, drayber patay

CEBU, Philippines — Patay ang usa ka lalaki dihang ang motorsiklo nga iyang giluwanan ang kalit lang naakidente  samtang nagdagan kini alas-8 pasado ang takna sa miaging Domingo sa gabii  sa Barangay  Ibabao Seaside Road  sa Lungsod sa Cordova.

Ang biktima giila base sa iyang driver’s license nga nakuha sa kapolisan nga mao si Michael John Garcia Cabio nga taga Pakigne sa Lungsod sa Minglanilla.

Sa taho ni Police Major  Jofree Grande,  hepe sa Cordova Police Station kusog nga nagpadagan sa iyang motirsiklo ang biktima apan sa pag-abot sa maong lugar nawad-an kini og kontrol sa motor hangtod nga nalamba kini ngadto  sa karsada. Gumikan sa kusog nga impact sa pagkalamba nakaangkon siya og grabeng kadaut sa kalawasan ug sa ulo.

Dali kining gidala sa mga personnel sa Cordova Disaster Risk Reduction and Management Office sa Lapu-Lapu City District Hospital apan gideklarar kini sa mga doktor nga patay na. (BANAT NEWS)