Mga bakwit sa Kanlaon hayan mag Pasko sa evacuation centers

CEBU, Philippines — Dako ang posibilidad nga ang mga bakwit sa Canlaon City tungod sa pag-alburoto sa bulkang Kanlaon, mag-selebrar sa Pasko ug mosugat sa Bag-ong Tuig diha sa mga evacuation centers.

Si Joel Erestain, ang regional director sa Office of the Civil Defense sa Central Visayas (OCD-7) nagkanayon, tungod kay dili matag-an ang kalihokan sa maong bulkan human kini nag-alburoto niadtong Disyembre 6, nagpabilin nga delikado gihapon ang anaa sa six-kilometer danger zone.

“Malaki po ang posibilidad. It’s almost sure that they will spend Christmas there (evacuation center),” matud ni Erestain atol sa phone interview sa mga sakop sa media.

Nagpasalamat hinoon ang OCD nga gikan sa target nga 6, 000 ka mga indibidwal nga angayan pabakwiton gikan sa 6-kilometer danger zone, sobra 5, 000 na ang nisanong.

Ang kinahanglan lang karon mao ang pasustiner sa ipakaon sa mga bakwit.

“That’s why the national government is taking step in helping them kasi alam naman natin na hindi kakayanin nga local government. The province ay tumulang na rin,” matud ni Erestain.

Sa pagkakaron, anaa pa gihapon sa Alert Level 3 ang bulkang Kanlaon.

Base sa pagmonitor sa Phivolcs niadtong Disyembre 15, miabot sa 12 ka volcanic earthquakes ang natala sa bulkang Kanlaon.

Mibuga kini og 6535 nga sulfur dioxide ug miabot sa 74 metros ang gitas-on sa pagbuga sa abo.

Base sa talaan sa kagamhanan sa Canlaon City niabot na ngadto sa 5,049 ka individuals ug 1,583 ka pamilya ang anaa karon sa walo ka mga evacuation camps sa Canlaon City.

Gawas niini adunay mga dili mominos 34 ka pamilya o 100 ka individuals ang kasamtangan nga nanimuyo sa gawas sa evacuation center.

Ang mga opisyal sa Canlaon padayon niawhag sa katawhan nga magpabiling alerto ug adunay kahibalo sa mga panghitabo sa ilang palibot.

Ang mga opisyal sa Canlaon City nanawagan na usab ug tabang mga cash man o in-kind alang sa mga evacuation camps.

Apan aron masiguro ang husto nga paglista ug patas nga pagapud-apod giawhag ang modonar nga ihatag ang ilang mga donasyon sa Incident Command Post sa Canlaon City Tourism Office.

Ang mga panginahanglanon naglangkob sa plato, yahong, electric fan, flashlight, emergency light, sugnod (kahoy pangluto), gatas, diapers, dagkong kawa ug kaldero, ug uban pa.

Alang sa Donasyon pinaagi sa banko pwedeng ideposito ang inyong tabang sa DBP: Account Name: Canlaon City Negros Oriental Account Number: 1377858. (BANAT NEWS)