CEBU, Philippines — Ang konseho sa Dakbayan sa Sugbo nihangyo sa buhatan sa mayor sa pagpahigayon og fraud-risk assessment sa multi-million peso nga mga proyekto nga gihimo.
Kini gumikan sa mga kabalaka sa wala pa mahuman nga mga proyekto sa Dakbayan sa Sugbo.
Giaprobahan sa konseho sa siyudad ang resolusyon nga giduso ni Konsehal Rey Gealon kabahin sa maong awhag.
Giawhag usab sa konseho ang buhatan sa mayor nga makig-alayon sa Commission on Audit (COA) sa paghimo og fraud-risk assessment sa multi-million-peso projects nga pagahimuon sa dakbayan.
Ang criteria sa maong mga assessment magbase sa mga proyekto nga nagkantidad ug kapin sa P50 milyones.
Laing resolusyon nga giduso usab ni Gealon nga giaprobahan sa konseho mao ang paghangyo sa COA nga mohimo og audit sa Cebu City Sports Center (CCSC) track oval, usa ka proyekto nga gi-award ngadto sa SBD Builders nga bag-o lang nag-atubang og pipila ka mga diskusyon tungod sa kalangay sa pagkompleto niini
Gihangyo usab sa konseho ang COA nga mohimo og audit sa Reinforced Deck Girder Bridge nga proyekto nga magkonektar sa sitio Candarong paingon sa Tanay Road nga nakahatag og kabalaka sa mga residente tungod sa negative slippage nga 63.98 porsyento ug pagkalangay sa pagkompleto niini.
Nikabat ngadto sa P24 milyones ang maong proyekto nga nagsugod niadtong Septiyembre 15, 2023, orihinal nga gikatakdang mahuman sa Mayo 11, 2024.
Ang maong proyekto nga gi-award usab ngadto sa SBD Builders, bag-o lang gi terminate human sa usa ka resolusyon sa barangay nga nanawagan sa pagpaubos og state of emergency status.
Ang konseho nagkanayon nga ang Dakbayan sa Sugbo naghimo og nagkalain-laing multi-million peso projects hinungdan nga gikinahanglan ang paghimo og fraud-risk assessments aron masiguro nga ang mga proyekto mahatag ngadto sa mga lehitimong contractor ug ang mga contractor nagpatuman sa mga proyekto subay sa gisugyot nga mga plano.
Nakita sa konseho nga gikinahanglan ang pagpahigayon sa samang audit alang sa CCSC track oval nga kasamtangang gisirad-an alang sa pag-ayo.
Kini laing proyekto nga gihatag ngadto sa SBD Builders. (BANAT NEWS)