Gipamatay kay wala siya pautanga

CEBU, Philippines — Nadakpan sa kapulisan sa San Francisco Police Station ang suspect nga mipusil patay sa magtiayon ug sa ilang sinagop nga 14-anyos nga dalagita niadtong Disyembre 12, 2024, sulod mismo sa ilang panimalay sa Sitio Timubo, Barangay Cabungaan, Lungsod sa San Francisco, Isla sa Camotes.

Ang suspetsado nagpaila sa kapulisan nga si Dy Cabahog Batiller, 43-anyos, dunay kaipon. Apan ang iyahang gisulti nga ngalan sa Barangay Cabungaan kay Rey Martinez.

Nadakpan kini sa Sitio Lantawan, Barangay Esperanza, Lungsod sa Poro sakop gihapon sa Isla sa Camotes niadtong Sabado sa buntag, Disyembre 14, 2024.

Lumad matod pa nga taga Barangay Bangcasi, Butuan City,  Agusan del Sur ang suspetsado.

Na-recover sa kapulisan ang kalibre .45 nga armas nga dunay siyam ka bala nga maoy gituohang iyang gigamit sa pagbuhat sa krimen.

Apil sab sa na-recover sa kapulisan ang motorsiklo nga iya sa mga biktima nga iyang gigamit sa isip getaway vehicle human mahimo ang pagpamusil.

Nagkanayon si Patrolman Ramel Suralta, imbestigador sa San Francisco Police Station nga niangkon matud pa sa pagpusil patay sa magtiayong Bernardo Perez Sampan, 42 years old, ug asawa niini nga si Narsisa Sabroso Sampan, 41 years old ug sa sinagop nila nga 14-anyos nga dalagita.

Nasayran nga natultolan nila ang gitaguan sa suspek human makadawat impormasyon gikan sa tag-iya sa payag nga gikatulgan sa suspek.

Ni-report kini sa barangay ug nibutyag nga naay naay tawo sa iyahang payag unya wala siya kaila.  Nakig-alayon dayon ang barangay sa kapulisan hinungdan nga ilahang giadto ug gi-verify ug nakompirmar nga mao kini ang suspect sa shooting incident sa Barangay Cabungaan.

Apan dihang nakabantay ang suspect sa presensiya sa kapulisan nidagan kini apan gigukod sa mga police hantod nadakpan.

"Sa wala pa nahitabo ang krimen nag-away-away sila sa iyang asawa mao nagregor iyang utok...Unya ang motibo personal kani bang lahi siya nasagmuyo kay gibalibaran human nangutang," tubag ni Patrolman Suralta dihang gipangutana kun unsay motibo sa krimen.

Giandam na sa kapulisan ang kasong multiple murder nga ipasaka batok sa suspetsado.  IBM BANAT NEWS