NBI nipahimangno batok sa cybercrime

CEBU, Philippines — Ang National Bureau of Investigation Central Visayas Regional Office (NBI-CEVRO) nipahimangno kabahin sa nagsaka nga risgo sa cybercrime niining holiday season.

Matud ni Francis Señora, NBI-CEVRO supervising agent nga ang pagtaas sa purchasing power sa mga tawo nga naghimo kanila nga dali madani sa mga scammer.

“This season is one of the most exploited seasons by online criminal scammers because of the reason that everyone is giving”, matud ni Señora.

Base sa imbestigasyon nga gihimo sa mga operatiba sa NBI-CEVRO nakita nila ang 10 sa mga pinakapopular nga cybercrimes.

Ug ang ilang buhatan karon makasugat og tulo hangtud  sa upat ka kaso sa cybercrimes kada adlaw.

Una sa listahan ang delivery scams diin ang mga biktima nakadawat og mensahe nga nagkanayon nga aduna sila’y package nga maabot ug nangayo ang mga scammer og bayad alang sa buhis o fees apan walay naabot nga package.

Sunod niini ang mga fake shopping websites diin ang mga scammer maghimo og mga fake accounts aron magbaligya og mga produkto o serbisyo ug human makadawat og bayad walay ipadala nga items.

Ikatulo ang fake redemption websites nga nanghatag og mga promos ug pag-click sa link aron makakuha og points apan pagkahuman ang mga scammer mangolekta sa personal nga impormasyon sa biktima.

“When you try to click that link, they will ask for information… so instead of you getting a free price, you’re giving them free information”, ni Señora pa.

Sama sa fake redemption websites adunay gift redemption websites nga maghimo og ilusyon nga magahatag og mga regalo o premyo apan mangayo og personal nga impormasyon sa mga biktima.

Samtang, adunay task scams diin ang mga biktima pahimuon sa pagkompleto og mga yano nga tasks, sama sa pag-like sa usa ka page o pag-follow sa usa ka website.  Sa pagpadayon sa mga tasks ang scammer mangayo og bayad aron makadawat og mas dako nga kintahay nga sweldo apan dili diay kini tinuod.

Ang uban pang mga kumon nga cybercrimes naglakip sa crypto scams, online paluwagan scams, fake relative/friend scams, romance scams, ug loan scams.

Si Señora niawhag sa pagpanalipod sa personal nga impormasyon ug sa pagsunod sa maayo nga cyber etiquette aron maprotektahan ang identity online. BDB BANAT NEWS