130 ka Talisaynon nakabenepisyo sa libreng serbisyo sa medical

CEBU, Philippines — Niabot sa 130 ka mga Talisaynon ang nakapahimulos sa libreng laboratory ug ibot sa ngipon.

Si Dr. Lino Alanzado, pangulo sa City Health Office nagkanayon nga 100 ka tawo ang nagpa-laboratory ug nagpakonsulta samtang 30 ka tawo ang nagpaibot sa ilang ngipon.

Ang mobile clinic nagsugod duha ka semana ang nakalabay diha sa lain-lain nga barangay.

Niadtong Huwebes, diha sila sa Barangay Bulacao diin nipahigayon sila og mobile x-ray, hematology analyzer, ECG, auto chemistry analyzer, urinalysis, fasting blood sugar, lipid panel, SGTPT, creatinine , blood uric acid ug dental services.

Si Mayor Gerald Anthony “Samsam” Gullas, Jr. nagkanayon nga gituyo nila ang programa sa city hall tungo kay mao kini ang numero uno nga gikinanglan sa mga tawo ilabi na sa mga edaran.

Gawas niini, gituyo nila nga mopaduol sa mga tawo aron dili na hasol alang kanila.

Nagkanayon si Gullas nga daghan pa unya nga mga barangay ang ilang masuroy sa umaabot nga mga adlaw. BDB BANAT NEWS