Baricuatro nisaway pagkansela sa CMCI

CEBU, Philippines — Gisaway ni Cebu PDP gubernatorial candidate Pamela "Pam" Baricuatro ang pagkansela sa Cities and Municipalities Competitiveness Index (CMCI) survey sa Department of Trade and Industry (DTI).

Si Baricuatro nagkanayon nga angayan lang nga motingog ang ubang mga local chief executive kabahin niini.

Matud sa DTI nga ang CMCI usa ka tinuig nga ranking nga gihimo sa Department of Trade and Industry (DTI) sa Pilipinas aron masusi ang performance sa mga siyudad ug lungsod base sa economic dynamism, government efficiency, infrastructure, ug resiliency.

 Dinhi sa Sugbo si Baricuatro nagduda nga naimpluwensyahon ang DTI sa kanselasyon.

Nagtuo siya nga natabunan sa mga propaganda ang tinuoray nga kahimtang sa probinsiya.

Iyaha nga gikwestiyon si DTI Secretary Maria Cristina Roque sa paggama sa maong desisyon nga matud niya base sa suwat sa kalihim ngadto kang Cebu Gov. Gwendolyn Garcia nga walay pirma, makita nga wala kini igong kasinatian kon unsa ang maong survey sa katakos sa LGUs, sa matang kalamboan, ug ekonomiya.

Base sa suwat, si Roque nagkanayon nga ang CMCI survey walay gikonsulta nga mga ahensiya nga gikinahanglan sa pagbuhat sa parameters sa maong survey ug posibleng dili kini haom nga makapakita sa riyalidad sa ubos.

Apan matud ni Baricuatro nga ang CMCI lehitimo nga survey ug award nga dili sama niadtong mabayaran ug mapalit nga maoy nauso karon.

Gikataho nga ang CMCI local competitiveness framework nigamit sa framework sa Harvard Business School strategist Michael Porter nga kaylap nga giila sa global competitiveness surveys ug gigamit sa CMCI pagpamatuod sa kamaayo o pagkapakyas sa usa ka LGU sa paggamit sa iyang mga nagpalibot nga kahimanan aron mapa uswag ang kalidad sa panginabuhi lakip ang klima sa ekonomiya.

Gitumbok ni Baricuatro nga angayan lang nga adunay ipahigayon nga konsultasyon una kanselahon ang CMCI. sNunot niini, nanawagan si Baricuatro sa mga gobernador ug mayor lukop nasud nga makanunayong mga awardee ug kadtong nadasig sa pagkab-ot sa kompetisyon nga mga sumbanan sa pagtingog isip usa ka lakang nga mag-level up imbes nga mobalik sa pagka-“Jurassic”. BDB BANAT NEWS