Mama, anak gipatay tungod sa selos

CEBU, Philippines — Patay ang manag-inahan diin lakip ang minor de edad niining anak human sila gipamusil sa uyab-uyab sa ginang tungod sa selos pasado alas -8 sa gabii adlaw nga Miyerkules diha sa Sitio San Roque, Barangay Valladolid Dakbayan sa Carcar.

Ang gipatay mao sila si Jennive Abella ug ang katorse anyos niini nga dalagita.  Samtang ang suspetsado  mao si Jethor Lapinña, 60-anyos kapin ang pangidaron ug giingong uyab-uyab ni Abella.

Ang dalagita nga gipatay dili kini anak sa suspetsado kung dili iya kini sa langyaw nga unang gikarelasyon sa inahan, base sa pamahayag sa mga silingan.

Ang suspetsado giingong nalambigit na sab sa pagpatay kaniadto human nga kini maoy gitumbok nga mipatay sa iyaha rang pag-umangkon matud sa mga silingan sa mga biktima nga nagdumili sa pagpaila.

Dako ang ilang pagtuo nga selos ang nagtukmod sa maong suspetsado nga nabuhat niini ang krimen ilabi na aduna na kini pangidaron ug batan-on pa ang maong babaye.

Ang  mga silingan sa mga biktima nakadungog og paka sa buto sa gituohan nilang armas ug pipila ka gutlo nahilom ug nakita nila nga nilakaw ang suspetsado.

Sunod nilang nakita ang nagbuy-od nga mga lawas sa managinahan nga naligo na sa ilang kaugaligon nga dugo.

Ang mga silingan nibutyag nga pirme nilang madungog ang suspek ug ang ginang nga maglalis  ilabi na kun kini mahubog, ug adunay higayon nga nanion kini og armas.

Ang mga biktima nakaangkon og pinusilan sa nagkadaiyang parte sa ilang kalawasan nga maoy naingnan sa ilang hinanali nga kamatayon.

Nianang higayona, giingong hubog ang suspetsado nga niadto sa balay sa mga biktima apan niresulta na sab kini sa panaglalis ug nahitabo ang maong krimen.

Nadakpan ra sab dayun ang suspek diha sa panimalay niini atol sa hot pursuit operation.

Apan ang laing kapuyo ni Jethor nga si Warlita nihulagway nga buotan ang iyang kapuyo ug manggihatagon apan seloso gyud kini.

 Miangkon si Warlita nga dugay na siyang nakahibalo nga duna kini laing karelasyon ug iyaha lang kining gidawat tungod kay mosustento man gihapon kini kanila.

Ang suspek wala mohatag og pamahayag mahitungod sa iyang gibuhat. Nakuha sa crime scene ang tulo ka bala sa .45 caliber ug duha ka kabhang usab niini.  IBM BANAT NEWS