CCPO, PCG nangandam na sa Sinulog 2025

CEBU, Philippines — Sayo nga nangandam ang Cebu City Police Office(CCPO) sa umaabot nga Sinulog 2025 kini aron makita nila kun unsay pay angayang palambuon sa ilang preparasyon matud pa ni Police Lieutenant Colonel Maria Theresa Macatangay, Deputy City Director for Operations ug tigpamaba sa Cebu City Police Office nga niadtong Lunes nag walkthrough sila tibuok rota sa solemn procession.

Ibalik sa Cebu City Sports Center ang Sinulog 2025 ug gikonsiderar sa kapulisan ang seguridad, ug peligro tungod  kausaban sa dalan nunot sa nagpadayong pagtrabaho sa Cebu Bus Rapid Transit (CBRT).

Napanglantawan na nilang daan nga mas daghang tawo ang mosaksi  sa Sinulog 2025 tungod gibalik na kini sa CCSC.

Samtang nga Philippine Coastguard Central Visayas nagsugod na pagdawat sa mga magpalistang mga sakyanan sa dagat nga buot moapil sa  fluvial procession sunod tuig. Modawat sila kutob Enero 6, 2025.

Gibahin sa duha ka dibisyon ang mga barko, ubos sa Division 1 nga adunay 35.1GT-300GT gibug-atong barko nga walay katig ug ang ikaduha, Division 2 may gibug-aton nga  3.1GT-35GT "Medium" motor-bancas nga dunay katig.

 Ang mga opisyal sa PCG-7 niawhag sa mga nagdumala og mga sakayan nga magparehistro gayud kay walay tugotang makaapil nga dili rehistrado aron malikayan ang mga disgrasya. Rowena D. Capistrano/IBM BANAT NEWS