CEBU, Philippines — Dunay mga bakwit ug ingon man mga residente duol sa mibuto nga Mt. Kanlaon ang nakasinati og paghuot sa dughan ug lisud pagginhawa tungod aning ashfall sa ilang lugar gikan sa gibugwak nga aso ug abo gikan sa maong bulkan.
Sa press conference sa Department of Health (DOH) uban sa Presidential Communications Office (PCO) ug Office of Civil Defense (OCD) nga gi-live stream sa People's Television Network, Si Health Undersecretary Gloria Balboa miingon nga tungod kini sa epekto sa ashfall.
Gitutokan karon sa ahensya ang medikal nga panginahanglan apektado ilabi na kadtong naa sa mga evacuation centers dungan sa pag-alerto sa mga ospital sa maong lugar. Nagpadaa na sab didto og dugang medical supplies sama sa mga face mask ug mga tambal.
Matud pa sa OCD adunay 45,291 ka mga residente sa La Carlota City, La Castellana City, and Canlaon City nga kinahanglan pa nga i-relocate.
Si OCD Assistant Secretary Raffy Alejandro miingon nga basi gidaghanon sa kinahanglang pabakwiton sa Department of the Interior and Local Government moabot kini 84,549 ka mga indibidwal, o dul-an sa 17,000 ka mga pamilya. Apan 46 porsiyento pa ang ilang napabakwit o 39,258 ka tawo nga gibutang karon sa 30 ka evacuation centers.
Si Alejandro miingon mas modaghan ang maapektahan.
Niadtong Disyembre 12, 2024 nibuto ang Mt. Kanlaon ug nagpabilin kini nga ubos sa Alert Level 3 o magmatic unrest. Gipahinumdoman sa Philvocs nga tanan sa mga posibleng peligro nga mahitabo sama sa kalit nga eksplosibong pagbuto, lava flow o effusion, ashfall, pyroclastic Density Current (PDC), rockfall, ug lahar sa panahon sa kusog nga ulan.
Sa pikas bahin, si Senador Manuel “Lito” Lapid miingon nga kining iyang gipangamahanang balaud nga bag-ohay lang napirmahan nga Republic Act No. 12007 o “Student Loan Payment Moratorium During Disasters of Emergency Act” dako kaayo og matabang sa pamnilyang mga Pilipino nga naigo og katalagman. “Ang batas na ito ay handog natin sa ating mga estudyante at sa kanilang mga pamilya. Bahagi po ito ng mga batas na tutulong sa mga ating mga kababayan na naaapektuhan ng mga kalamidad,” matud pa ni Lapid.
Ang maong balaod nagdasig sa tanang pamilyang Pilipino nga mo-invest sa edukasyon sa iang mga anak pinaagi sa pagsiguro sa gobiyerno nga bisan pa sa nahitabo magpadayon gihapon sila sa ilang pagtungha.
“Layunin po ng batas na ito na bigyan ng kapanatagan ang mga pamilyang Pilipino na patuloy na mag-invest sa pag-aaral ng kanilang mga anak. Narito po ang inyong gobyerno upang tulungan kayo kung sakaling mangailangan kayo dahil sa mga delubyong dumaraan sa ating bansa taun-taon,” dugang pa niya kinsa nagpasalamat nga gipirmahan na kining balaora ni Presidente Ferdinand Marcos Jr.
Ang Pilipinas kanunay maigo og bagyo ug nakatala og 798 ka linog kada tuig. Ang pipila niini grabe ang epekto sa mga pamilyang Pilipino. Si Lapid kinsa maoy principal author sa maong balaod, wala makahuman og eskuyla tungod sa ilang kapobrehon. IBM BANAT NEWS