Lalaki nakuhaag P1.3 milyong shabu

CEBU, Philippines — Nadakpan sa mga operatiba sa Waterfront Police Station 3 Cebu City Police Station ang usa ka high value individual dihang nagpahigayon sila og buy-bust operation sa Black Blessed, Barangay Tejero, siyudad sa Sugbo, Miyerkules sa gabii, Disyembre 11, 2024.

Ang nadakpan mao si Domingo Villacorta Hongayo alyas Doming, 42, taga  Barangay Dumlog, dakbayan sa Talisay. Ang suspetsado nabutang sa drug watchlist sa kapulisan.

Nasakmitan ang suspetsado og 205 gramos nga drugas nga nagkantidad og P1.3 million.

Padayon ang imbestigasyon sa kapulisan sa Waterfront Police Station ilabi na sa pagsuta kun asa gikan ang drugas nga nasakmit.

Sa pikas bahin, giaprubahan sa Hunta Probinsiyal ang mga resolusyon sa pagdayeg sa duha ka drug cleared nga mga barangay sa Lungsod sa Dalaguete ug Dumanjug nga mao ang Barangay Mananggal ug Barangay Candabong  nga  gideklarar nga mga drug cleared sa Region VII Oversight Committee on Barangay Drug Clearing Operation.

Ang deklarasyon subay kini sa Philippine Drug Enforcement Agency (PDEA) Memorandum Circular No. 2020 – 026 ug Dangerous Drugs Board (DDB) Regulation No. 4, serye sa 2021 nga nagpadayon sa pagpatuman sa Barangay Drug Clearing Program (BDCP).

“It is the paramount concern of the local government unit to maintain peace and order and to effectively curb the proliferation of dangerous drugs and substance,” tipik sa resolusyon nga gipangamahanan ni Bokal Thadeo Jovito Ouano, chairman sa committee on Public Safety, Peace and Order; and Dangerous Drugs Prevention. Kristin de Dios/IBM BANAT NEWS