Polis ipakatap sa mga simbahan atol sa Misa de Gallo

CEBU, Philippines — Duha ka oras sa dili pa magsugod ang Misa de Gallo ipakatap na sa Cebu City Police Office (CCPO) ang mga polis nga mobantay sa siguridad sa mga simbahan lakip ang chapel nga magpahigayon og misa.

Matud ni Police Lieutenant Colonel Maria Theresa Macatangay, deputy city director for operations ug tigpamaba sa Cebu City Police Office nga 33 ka simbahan ang magpahigayon og Misa de Gallo.

Igong personnel ang ipakatap sa CCPO ug giklaro nila nga gawas sa mga simbahan bantayan usab nila ang mga terminal ug ubang dapit nga dugokan og daghang tawo.

Magpatrolya usab ang kapolisan sa mga dapit nga adunay malls tungod kay gilaoman nila nga daghan ang manggawas aron mamalit sa ilang regalo ug pagpangandam sa pasko ug bag-ong tuig.  Gimandoan ang mga chief of police nga makig-alayon sa mga kadagkoan sa simbahan ug organizers sa kalihokan. BDB BANAT NEWS