Jubilee Year 2025 buksan karong Disyembre 29

CEBU, Philippines — Buksan karong Disyembre 29 Jubilee Year 2025 nga adunay tema Pilgrims of Hope diin gihimo na ang pagpangandam sa simbahan alang sa maong dakung kalihukan.

Nasayran ang maong selebrasyon mahitabo matag 25 ka tuig diin ang katapusan nga selebrasyon niadto pang tuig dos mil.

Atol sa pagbukas sa usa ka tuig nga selebrasyon adunay procession nga dungan nga ipahigayon sa upat ka mga dapit.

Ang mga procession ipahigayon sa Cebu City gikan sa Capitol padulong sa Cebu Metropolitan Cathedral, sa Dakbayan sa Carcar St. Catherine de Alexandria Parish, sa Dakbayan sa Danao Santo Tomas De Villanueva Parish ug Saint Peter Bantayan Island.  Sa Cebu City matud pa ni Msgr. Marnel Mejia, Chairman sa Procession Committee, adunay procession nga ipahigayon sa Jubilee Icon ug adunay mga nakadestino nga modala sa maong krus matag cluster hangtud nga maabot na kini sa simbahan sa Cathedral. Gitug-an usab ni Fr. Glenn Therese Guanzon, Chairman sa Commission on Worship, subay sa kalihukan sa Jubilee Year aduna silay mga programa nga giandam subay sa aprobado nga plano sa Archdiocese of Cebu.

Gipadayag ni Guanzon nga makadawat ug plenary indulgence kadtong mga tawo nga makasulod sa mga jubilee churches ilabi na kung anaa sila sa estado sa grasya diin nakapangompisal sa ilang mga sala.

Ang arsobispo sa sugbo Jose Palma, niawhag sa tanang mga magtutuo nga moapil sa maong dakong kalihukan ug sa pagbisita usab sa mga simbahan nga gipaubos isip mga Jubilee Churches. (BANAT NEWS)