CEBU, Philippines — Human sa gihimong pag apod apod sa financial aid ngadto sa mga senior citizens sa siyudad sa Sugbo gitakda na usab ang pagpanghatag og tabang pinansyal ngadto sa mga kalipikado nga mga persons with disabilities karong Disyembre 14.
Kini segun sa pahibawo sa Cebu City PIO hinuon wala pay gisulti nga venue sa pagpanghatag apan gipaabot nga ihatag kini diha sa matag barangay sama sa naandan.
Base sa miagi nga pagpanghatag, adunay mokabat sa 13 mil ka registered PWDs dinhi sa dakbayan sa Sugbo nga makadawat sa P 1,000 matag buwan nga financial assistance gikan sa kagamahan sa siyudad.
Alang niadtong dunay mga pangutana o clarification kabahin sa financial aid, gidasig nga moadto o motawag sa Department of Social Welfare Services.
Gawas sa distribution sa PWD financial aid, ang kagamhanan sa dakbayan mipahibawo usab nga dunay himoon nga laing city-wide clean-up drive unya sa December 14.
Ang nagsingabot nga kalihukan maoy ika-18 nga edisyon sa pagpanglimpyo ug maoy kataposan karong tuiga.
Alang niadtong interesado nga mosalmot sa clean-up activity ang giawhag nga magpa rehistro og sayo ngadto sa Environment and Natural Resources’ Office.
Samtang gipahibawo sa City Treasurer’s Office nga abli ang ilang opisina sa petsa 14, 21, 28, 30 ug 31 ning buwan sa Disyembre. Kini gituyo aron maka- accommodate sa mga mobayad sa ilang real property tax.
Ang deadline sa 4th quarter RPT payment karong December 31, 2024.
Adunay 10-percent discount nga ihatag alang niadtong makabayad sa adlaw ug sa dili pa ang gitakda nga deadline.
Apan ang makapahimulos niini mao kadtong mga property owners nga dili tax delinquent.
Samtang two-percent interest per month ang ipatuman usab alang niadtong mga late payments ug mahimo usab nga mobayad sa online pinaagi sa www.rpts.cebucity.gov.ph. (BANAT NEWS)