Gidudahang tulisan gialarma, nadakpan

CEBU, Philippines — Nasikop sa kapolisan ang usa ka 28-anyos nga lalake nga giingong tulisan human kini gialarma nga armado sa Osmeña Boulevard, Barangay Sambag 2, siyudad sa Sugbo, Huwebes sa kaadlawon, Disyembre 5, 2024.

Ang suspetsado mao si Vergel Paglinawan Marson, 28, nagpuyo sa Sitio Kapakulan, Barangay Tisa ning siyudad.

Nihimo og validation ug verification ang kapulisan sa Abellana Police Station 2 Cebu City Police Office sa dapit human makadawat og tawag gikan sa concerned citizen labot sa presensiya sa armadong tawo nga nagsul-ob og nutshell helmet color green, maroon jacket ug short.

Pag-abot sa kapulisan nakit-an nila ang suspek ug dihang giduol na unta nidagan kini ug gilabay ang gidala-dalang armas. Apan gigukod siya sa mga polis hangtud nadakpan. Gipunit sa mga polis ang .38 kalibre rebolber nga dunay upat ka bala.  Wala kini lisensiya paghupot niini.

Gawas sa armas nakuha sab gikan sa tuo nga bulsa sa shorts niini ang usa ka sachet sa gituohang shabu.

Nagkanayon si Police Captain Mark Eric Papong, hepe sa Abellana Police Station 2 nga posibleng padung manulis ang suspetsado ug mga tinun-an ang biktimahon niini sa dapit.

Kasong kalapasan sa Republic Act 10591 ug Republic Act 9165 ang ipasaka batok sa suspetsado.  IBM BANAT NEWS