CEBU, Philippines — Patay ang managsuon nga batang babaye human sila gipamusil sa ilang amahan diha sa Purok San Roque, Barangay Buntis, Lungsod sa Bacong, Probinsya sa Negros Oriental, kagahapon sa buntag, Disyembre 5, 2024.
Human mahimo ang krimen ang amahan nga usa ka security guard, 30-anyos ug nagpuyo sa naasoy nga dapit nagpusil sab kini sa iyang kaugalingon ug namatay sab.
Pag-abot sa mga sakop sa Bacong Police Station sa Negros Oriental Police Provincial Office(NOPPO) nakit-an nila ang lawas sa mga biktima ug sa ilang amahan nga nagbuy-od ug nagkadugo diha sa barangay road, 20 metros ang gilay-on gikan sa gate sa ilang panimalay.
Sa tiilan sa amahan dunay nakit-an nga .9mm nga armas nga maoy gigamit sa pagpamusil.
Nagkanayon si Police Major Vann Joel Tingson, hepe sa Bacong Police Station nga ang inahan sa mga bata nagkuha og Barangay Protection Order niadtong Oktubre 4, 2024 batok sa suspek sa dihang nagpuyo pa sila sa Barangay Bacagay, Dumaguete City tungod kay kusog kaayo kining mangulata sa ginang.
Pagka- buwan sa Nobiyembre nibalhin og puyo ang asawa ug gidala ang iyang mga anak diha sa Barangay Buntis, Lungsod sa Bacong.
Nikuha gihapon kini og Barangay Protection Order sa Barangay Buntis apan wala madayon tungod kay nagkasabot sila sa Department of Social Welfare and Development nga bisitahon sa amahan ang iyang mga anak.
Apan kagahapon sa buntag niabot ang amahan ug nihangyo sa asawa nga huwaman ang ilang anak. Apan wala mosugot ang inahan hinungdan nga nagkalalis silang duha.
"Pagkakaron man gud tungod murag dili na gani ganahan makig-estorya ang inahan..Karon at the state of shock and then murag dili na siya ganahan makig-estorya unya naa na unta silay initial agreement didto sa DSWD pero amo pa balikan og interview ang inahan nganong wala siya nisugot," sigon ni Tingson.
Sa ilang panaglalis giingong kalit lang nibunot og armas ang amahan nga naa sa iyahang hawak ug gition ngadto sa asawa.
Apan nakadagan ang asawa palayo sa suspek hinungdan nga ang iyahang duha ka mga anak maoy iyang gipahimungtan. Gipusil sa amahan ang 5 anyos nga bata ug gisunod dayon ang manghod nga 3-anyos.
Gidala sa Holy Child Hospital Dumaguete City ang mga biktima apan ang 5-anyos gideklarar nga dead-on-arrival samtang ang 3-anyos nakabsan sa kinabuhi samtang naa sa Intensive Care Unit(ICU).
Nakakuha og impormasyon ang kapulisan nga giplanuhan nang daan sa suspek ang krimen tungod kay duna kini gi post sa Facebook nga "bye-bye world."
Gisundan kini og laing post kagahapon alas-6 sayo sa buntag nga nagpadayag nga dili na siya maabtan og tuig 2025.
Unya pagka alas 6:30 sa buntag kagahapon sayo matod pa kini nagparelibo sag i-duty han sa Capitol Site nga gikahibulong sa mga kauban niini tungod kay alas-7 pa man unta kini kutob.
Base sab sa estorya supervisor sa security agency nga gitrabahoan sa suspek nga gibilin sa amahan ang radyo ug giabandonar ang post niini ug niadto sa gipuy-an sa iyang asawa ug mga anak.
"Among tan-aw is premeditated, murag planado or murag ang event connected ang tanan, gikan sa iyang premonition unya aduna na sila'y marital issue gani gi-BPO na gani siya sa iyahang asawa and then ganiha pud sa iyang dutyhan sayo pud siya niadto siguro just to secure kanang katong iyang dad-on iyang armas kay kabalo man unta sila sa amoang trainings, seminar and orientation sa mga security guard dili gyud na nila pwede dad-on outside the perimeter of the detail order," asoy ni Tingson.
Posible matud pa nga selos ang nagtukmod sa suspek nga nahimo niya ang krimen kay base sa gibutyag sa mga nakaila sa suspek, seloso kini. IBM BANAT NEWS