PSA nagtanyag og E-Certificate System

CEBU, Philippines — Ang Philippine Statistics Authority (PSA) nagtanyag og E-Certificate System aron masulbad ang mga hagit sa pag-validate, pag-authenticate ug pagsiguro nga mahatud sa tukmang panahon ang mga dokumento sa civil registry nga isumiter sa lain-laing ahensiya sa gobiyerno, embahada, ug konsulado.

Ang maong system gihimo pinaagi sa PSA Serbilis (psaserbilis.com.ph) ug PSAHelpline (psahelpline.com.ph) ang awtorisadong online partners sa ahensiya. Base sa advisory sa PSA nagtugot kini sa mga end user sama sa mga embahada ug konsulado nga makadawat sa digital copy o e-copy sa gi-request nga mga dokumento sama sa certificate of live birth, certificate of marriage, certificate of death, ug certificate of no marriage pinaagi sa online portal o usa ka awtorisadong email address.

Kabahin sa proseso, ang mga kliyente mahimong mag-file online sa ilang mga requests sa civil registry documents pinaagi sa PSA Serbilis ug PSAHelpline, ug ang pagbayad himuon pinaagi sa awtorisado nga mga payment channel.

Ug kong maproseso na, ang mga dokumento sa civil registry direktang mahatud ngadto sa mga end users.

 Gawas sa PSA-to-embassy nga paghatud sa mga hard copy, gisuportahan sa PSA ang paghatag sa electronic nga mga kopya sa mga dokumento sa civil registry.

Matud sa PSA nga ang E-Certificate System magsiguro sa pagkatinuod ug integridad sa mga dokumento nga gisumiter ngadto sa mga embahada, konsulado, ug uban pang mga end user. (BANAT NEWS)