Cebu City nanawat na og contingent alang sa Sinulog 2025

CEBU, Philippines — Mga 35 ngadto sa 40 ka dancing contingent ang gusto ni Cebu City Mayor Raymond Alvin Garcia nga moapil sa Sinulog 2025.

Matud ni Garcia nga gibuksan na nila ang pagpanawat og mga moapil  nga contingent niadtong Disyembre 1, 2024 ug hangtud kini sa Disyembre 8, 2024.

Gibutyag ni Garcia nga iyahang gimando ngadto sa mga nagdumala sa panudlanan sa city hall ang pagpagawas dayon sa subsidy aron adunay magamit ang mga contingent.

Nunot niini, gikompirma ni Garcia nga napirmahan na usab niya ang imbetasyon alang kang Presidente Ferdinand "Bongbong" Marcos, Jr. nga motambong sa maong kalihokan ug mamahimo na kining ipahatud ngadto sa buhatan sa pangulo sa nasud. 

Si Garcia nagkanayon nga dako kaayong garbo sa siyudad kong anaa ang presidente sa maong kalihokan.

Ang Sinulog 2025 gikatakda kining ibalik sa pagpahigayon diha sa Cebu City Sports Center.

Si Garcia nagkanayon nga niining padulong na usab ang piniliay gilaoman niya nga daghan ang magpaimbitar apan kadtong opisyales nga wala imbitaha mamahimo gihapon sila nga mosaksi sa kalihokan

Giklaro ni Garcia nga ang presidente lang ang iyang hatagan og higayon nga makahatag og pamulong ngadto sa mga Sugboanon.

Alang sa ubang politiko hatagan og igong pag-ila ang ilang presensiya.

Pakig-estoryahon ni Garcia ang Sinulog Foundation Inc. aron makontrolar ang programa ug dili mahimong pagpangampaniya. (BANAT NEWS)