CEBU, Philippines — Usa ka buwan nga masuso ug otso anyos nga managkaluha ang gilawog sa ilang uyoan sa cyber pornography ang naluwas sa mga sakop sa National Bureau of Investigation-CEVRO gikan sa usa sa mga sitio sa Barangay Kalawisan sa Dakbayan sa Lapu-Lapu.
Ang mga opisyal sa NBI nironda sa pinuy-anan sa suspek human sa pakig-alayon sa US Homeland Security nga nagpahibalo kanila nga dunay mga kabataang gigamit sa suspek sa paghimo og malaw-ay nga pasundayag sa internet bugti sa bayad.
Ang maong mga bata gitanyag kini sa ilang uyoan nga bayot sa mga langyaw nga bugti sa kwarta nga ilang gipangayo.
Nakuha gikan kaniya ang tulo ka cellphones nga adunay sulod nga mga hulagway sa malaw-ay nga gipahanghimo niini sa mga batang biktima.
Apil sa nasakmit gikan sa suspek ang sex toys nga matud pa nakita sa usa sa iyang mga videos nga gipagamit niini sa mga batang biktima. Dako ang pagtuo ni Atty. Renan Augustos Oliva, director sa NBI-CEVRO nga sobra usa ka tuig na kining gihimo sa suspek diha mismo sa balay niini. Nagtuo sab siya nga nakahibalo ang mga ginikanan sa mga bata sa gihimo sa suspek.
Kining duha ka mga hamtong nga ilang gi-rescue sutaon sab kun dunay kalambigitan sa kaso.
Ang maong operasyon gipahigayon niadtong Nobiyembre 27, 2024 uban sa DSWD-7 ug IACAT-7 ug gipasakaan kini og kaso nga paglapas sa Sec 4 RA11930 o mas naila nga Anti-Online Sexual Abuse, RA10364 Expanded Anti-Trafficking in Person Act, RA7610 ug Sec 15 of RA9165.
Si Agent Maria Contessa Lastimosa nibutyag nga dako kaayo og tabang ang komunidad hinungdan iyang giawhag nga kini sila magpakabana ug motaho tungod kay ang mga bata kinahanglan dili kini sila pasipad-an.
Apan ang dinakpan kusganong nihimakak nga gibugaw niya ang iyang mga pag-umangkon. Nangangkon siya nga duna kini “afam” nga tighatag kaniya bugti sa mga hulagway.
Matud pa dunay gibanabanang kapin 300 ka mga malaw-ay nga hulagway sa mga bata ang nakita diha sa tulo ka cellphones niini. Matud pa lahi og rate ang bayad sa langyaw kun litrato lang o kung video gyud. (BANAT NEWS)