CEBU, Philippines — Gipasakaan na usab og kasong anti-graft and corrupt practices si Cebu City Mayor Raymond Alvin Garcia tungod sa giingong pagtugot niini sa mga kalihokan sa sabong sa usa ka hotel bisan og gibalibaran sa konseho sa siyudad.
Si Garcia nag-atubang kini og reklamo uban ni Cebu City Police Office (CCPO) Chief Police Colonel Antonietto Cañete nga gipasaka ni Kristian Hassamal.
Si Hassamal nipasaka og reklamong Grave Misconduct, kalapasan sa Akta Republika 6713, ug Article 208 sa Revised Penal Code (RPC) batok kang Garcia ug Cañete.
Si Garcia nag-atubang usab og laing kaso sa giingong paglapas niini sa Section 3(e) ug 3(j) sa Anti-Graft and Corrupt Practices Act diin ang maong reklamo gipasaka diha sa Office of the Ombudsman - Visayas niadtong Nobiyembre 18, 2024.
Ang reklamo ni Hassamal nagbase sa opinyon sa Cebu City Legal Office (CLO) nga giisyu niadtong Marso 20, 2024 nga nitubag sa pangutana ni Garcia bahin sa hustong proseso sa paghatag og special permit sa Ox KBDF Gaming nga makapahigayon og cock derby sulod sa dakong hotel niadtong Abril 21, 2024.
Base sa affidavit ni Hassamal, gitumbok nga ang CLO nipasabot nga ang maong kalihokan nahisubay sa kasamtangang ordinansa sa siyudad apan bisan pa niini gikinahanglan nga mokuha og permits.
Niadtong Abril 23, 2024, si Hassamal nagkanayon nga si Garcia niisyu og Letter of No Objection (LONO) sa hangyo sa Ox KBDF alang sa special permit sa paghimo og duha ka adlaw nga cock derby sulod sa nahisgutang hotel niadtong Mayo 23 ug 24, 2024.
Gikataho nga ang Business Permit and Licensing Office niisyu og special permit niadtong Mayo 10, 2024 apan giingong gilakip nila ang kondisyon nga ang event organizer mosumitir og resolusyon nga nag-aproba sa kalihokan gikan sa Sangguniang Panlungsod, usa ka police clearance ug pagbayad alang sa special permit fees.
Gipadayag ni Hassamal nga nahitabo ang kalihokan nga makita sa mga "promotional pictures" alang sa "May Derby" ug mga video nga gi-post sa Facebook.
Laing nagpalig-on sa reklamo nga adunay nagpadala og sulat niadtong Hulyo 3, 2024 nga nipadayg og pasalamat sa suporta ni Garcia sa kalihokan.
Ug sa samang suwat nangayo og laing gikinahanglang permit alang sa pito ka stag derby, sulod gihapon sa nahisgtuang hotel niining higayona sulod sa tulo ka adlaw.
Giingong si Garcia niluwat og laing LONO nga gilakip sa letter request nga gitumong kang Cañete niadtong Agosto 15, 2024 ug ang suwat naglakip og endorsement gikan sa CCPO.
Sama sa niaging kalihokan, usa ka special permit ang giluwatan sa BPLO niadtong Agosto 19, 2024.
Nagtugot kini sa pagpahigayon sa "Cockpit Combat II - The Seven Stag Early Bird Edition," ug ubos usab kini sa samang mga kondisyon sa BPLO sa dihang nag-isyu sa unang special permit niadtong buwan sa Mayo.
Dugang ni Hassamal nga adunay mga taho nga ang Ox KBDF nisang-at na usab og laing hangyo sa office of the mayor alang sa laing special permit sa pagpahigayon og laing kalihokan sa cock derby ug niining panahona sa kinatibuk-an nga walo ka adlaw gikan sa Oktubre 11 ngadto sa 18, 2024 diin ang maong kalihokan gitawag ug “October Derby.”
Apan ang ang maong hangyo wala na tugoti sa Sangguniang Panglungsod tungod kay giingong ang maong hotel dili kini accredited nga cockpit arena.
Apan bisan og gibalibaran sa konseho padayon gihapong gipahigayon ang kalihokan sulod sa walo ka adlaw.
Si Hassamal nipasangil nga ang organizers nakalapas sa PD No. 449 kun “Cockfighting Law of 1974” ug sa Cebu City Ordinance No. 1447. (BANAT NEWS)