CEBU, Philippines — Usa ang patay samtang unom ka tawo ang nangaangol sa nahitabong karambola sa mga sakyanan diha sa Sitio Kuadra, Barangay Lagtang, Dakbayan sa Talisay niadtong Sabado sa alas 6:00 sa gabii.
Base sa imbestigasyon sa City of Talisay-Traffic Operation Development and Authority (CT-TODA) nga paingon sa Barangay Tabunok ang multicab diin gimaneho kini sa usa ka lalaki nga gituohan nga nakainom og ilimnong makahubog.
Gikataho nga ni-overtake ang multicab sa nag-una nga motorsiklo ug nakasugat niini ang laing motorsiklo ug traysikol sa atbang nga lane.
Ang drayber sa motorsiklo nga nakasugat ang namatay samtang ang asawa niini nga backrider ang naangol.
Samdan usab ang upat ka pasahero sa traysikol lakip na ang drayber niini.
Gikustodiya sa kapolisan ang nakadasmag nga drayber samtang gipaabot ang pagpasaka og kaso batok kaniya.
Sa laing bahin, patay ang usa ka rider human naapil og kasunog dihang nibuto ang gimaneho niining motorsiklo gumikan sa pagkabangga niini ngadto sa usa ka wing van sa National Road, Barangay Tinaan, Siyudad sa Sugbo niadtong Sabado sa gabii.
Ang nalambigit sa aksidente mao ang Yamaha FZ motorcycle nga gimaneho ni Genolito Ramerez Ib-Ib, 52-anyos, taga Siyudad sa Sugbo ug ang HOKAN Sinotruk aluminum wing van nga gimaneho ni Teodoro Gador Matillano III, 49-anyos, minyo, taga Aguinaldo Street, Bais City, Negros Oriental.
Base sa imbestigasyon sa Naga City Police Station nga si Ib-Ib gikan sa Lungsod sa San Fernando ug paingon kini sa Cebu City samtang si Matillano gikan sa Cebu City ug padulong sa Lungsod sa San Fernando.
Apan pag-abot naasoy nga dapit giingong nikawat ang motorsiklo sa lane sa wing van hinungdan nga nagkabangga kini.
Ug gumikan sa kakusog sa impact ang motorsiklo ug drayber niini nalabay ug nibuto ang motorsiklo ug nasunog.
Nasunog ang lawas sa drayber sa motorsiklo ug dali kining gidala diha sa Vicente Mendiola Medical Center Infirmary Hospital sa Siyudad sa Naga apan gideklarar kining patay na nga naabot sa maong tambalanan.
Samtang ang drayber sa wing van gikustodiya kini karon sa kapolisan sa siyudad. (BANAT NEWS)