Katawhan gipahimangnuan batok sa online loan scam

CEBU, Philippines — Samtang nagpadayon pag-uswag ang teknolohiya o "digitalization" gipadayag sa Securities and Exchange Commission Cebu Extension Office (SEC-CEBEO) nga ang mga loan scam maoy nahimong dakong modus operandi dinhi sa Central Visayas. 

Sumala ni SEC-CEBEO director Atty. Sheara Lupango-Tamayo, daghan na ang nalimbungan sa mga "fraudulent activities" nga kasagarang gibuhat online. 

 “You know that scams are usually done online so we try to regulate that and we try to control that,” matud ni Tamayo.

Sumala sa balita sa Philstar, ang gidaghanon sa mga online lending app (OLPs) downloads miabot og 89.66 milyon niadtong 2023. Samtang, ang gidaghanon sa bag-ong users misaka ug dako og 64 porsyento, nga nakab-ot ang 47.46 milyon niadtong maong tuig. 

Misaka usab ang active users og 25 porsyento, nga nitotal og 7.7 milyon sa maong panahon. 

Aron ma regulate kini, gipahamtang sa SEC ang Memorandum Circular No. 10 series of 2021 o ang moratorium sa pagparehistro sa mga bag-ong online lending platforms (OLPs), nga nagtinguha nga mapugngan ang pagsaka sa mga scam ug mapahugtan ang regulasyon sa lending activities. 

Gisugyot usab ni Tamayo ang SEC advisory aron magiyahan ang mga manghulamay og kwarta sa husto ug luwas nga paggamit sa mga rehistradong OLPs. 

Gipahinumduman ang mga mangutang nga mag-amping ug basahon pag-ayo ang mga terms and conditions sa bisan unsang loan agreement.

Apil na niini ang pagsuta sa mga interest rates, fees, charges, payment schedules, ug mga due dates. 

Gipahimangnoan usab ang mga users nga magbantay sa pag-click sa mga links nga motugot sa OLPs nga maka-access sa personal nga impormasyon sama sa phone contacts o social media accounts. 

Gidasig sa SEC-CEBEO ang mga manghulamay nga susihon ang reputasyon sa lending platform pinaagi sa pagtan-aw sa mga reviews aron mahibaw-an kung ang plataporma nailhan ba sa harassment, dili awtorisadong pag-access sa contact lists, o sobra ka taas nga interest rates. 

Gihimug-atan usab sa advisory ang pahibalo nga nag-ingon, “Walang Lending o Financing Company na humihingi ng paunang bayad bago magbigay ng inuutang pera.”

Gidasig usab sa SEC ang publiko nga susihon ang kalig-on sa mga lending ug financing companies pinaagi sa pagtan-aw sa listahan sa mga licensed entities nga makita sa opisyal nga website sa SEC. 

Base sa SEC website sa Oktubre 8, 2024, dunay total nga 170 online lending platforms nga opisyal nga narehistro ug nagpakita sa opisyal nga website sa SEC.  MEL BANAT NEWS