Cesante, laing opisyal gikasohan sa mga senior citizen

CEBU, Philippines — Niabot sa 11 ka senior citizens ang nipasaka og kasong administratiba ngadto sa Office of the Ombudsman batok sa mayor sa Lungsod sa Dalaguete lakip sa officer-in-charge (OIC) sa Municipal Social Welfare and Development Office (MSWDO) tungod sa giingong paglapas nila sa mga katungod sa mga senior citizen sa lungsod.

Si Mayor Roland Allan Cesante ug Jona Villahermosa, OIC sa MSWDO ang nag-atubang og kasong grave misconduct, conduct unbecoming of a public officer, grave abuse of authority (favoritism/discrimination/oppression) ug kalapasan sa Akta Republika 7432 lakip na ang paglapas sa code of conduct and ethical standards for public officials and employees.

Ang 11 ka senior citizens nga gipangulohan ni Valeriano Velardo, mga residente gikan sa nagkalain-laing barangay sa Lungsod sa Dalaguete nipasangil nga wala sila makadawat og senior citizen financial assistance sukad nga sila niapil sa programa.

Ang reklamo nagsugod kini sa pag-apod-apod sa cash assistance sa lungsod sayo karong tuiga nga gipangulohan ni Cesante ug Villahermosa.

Ang mga nireklamo uban sa 1,815 ka senior citizens nga nag-edad og 60 ngadto sa 66-anyos nipasangil nga wala sila ilakip sa maong cash assistance tungod kay ang mayor giingong niimplementar kini og age cut off nga 67-anyos pataas lang ang hatagan sa maong benepisyo.

“Ang ubang senior citizens gitagaan og financial assistance, pero mura’g pinili ra sila, murag naay gipaboran", matud ni Velardo.

Ang maong mga senior citizen nipasangil nga ang nahisgutang mga opisyal nakalapasa Akta Republika 7432 kun “Senior Citizens Act”. Ang maong mga senior citizen nipasangil sa nahisgutang mga opisyal nga ilegal, malisyoso ug diskriminasyon ang gihimo niini ngadto kanila.

Samtang si Atty. Joey Borinaga, abogado sa mga nireklamo nagkanayon nga ang pagpasaka sa kaso magasuporta sa mga senior citizens ug uban pang mga residente nga wala nakadawat sa husto nga benepisyo gikan sa munisipyo.

Gibutyag ni Borinaga nga adunay kapin sa P7,000 nga narehistro nga senior citizens sa Lungsod sa Dalaguete.

Ang Banat News ug The Freeman nisulay sa pagtawag kang Cesante aron makuhaan sa iyang habig apan walay nitubag hangtud sa oras sa pagsuwat niining balita. (BANAT NEWS)