CEBU, Philippines — “I am now assuming as the elective mayor of the City of Cebu.” Mao kini ang deklarasyon ni Cebu City Mayor Michael Rama atol sa iyang gipahigayon nga press conference sa Casino Español kagahapon, Nobiyembre 28, 2024.
Gipadayag ni Rama nga andam na siya nga mobalik sa City Hall ug mobalik sa iyang katungdanan isip mayor sa syudad tungod kay napupos na ang unom ka buwan nga preventive suspension nga gipahamtang ngadto kaniya lakip na sa pito ka mga opisyales.
Uban sa mga abogado niini wala nila ilha ang gipagawas nga decision sa Ombudsman nga nag- dismiss kaniya sa katungdanan ug nipahamtang sab og perpetual dismissal to hold public office.
Wala matud pa nila madawat ang maong kamanduan dungan sa pagkwestyon sa pagpahurar sa DILG kang kaniadto Vice Mayor Raymond Alvin Garcia isip hulip sa iyang pwesto pagka Mayor sa siyudad sa Sugbo.
Gihagit niya ang iyang gitawag niyang pekeng mayor nga si Garcia ug ang kampo niini nga kasamtangang naglingkod sa City Hall lakip na ang mga lokal nga kapulisan nga andam niya nga isumiter ang iyang kaugalingon kun posasan man siya sa higayon nga motunob siya og pagbalik sa iyang buhatan.
“Kanang opisina diha, opisina na sa katawhan nga ako lang ang nahimong mayor. Ngano gud taw’n nga dakpon ko? Kung dakpon ko nila, sama ra sab nga gipadakop mong tanan (katawhan),” paghimug-at pa sa mayor.
Kahinumduman niadtong Nobiyembre 8, giposasan si kanhi City Administrator Collin Rosell tungod kasong usurpation of authority sa dihang nitaha kini og balik sa iyang buhatan.
Matud pa ni Rama samtang anaa siya sa gawas sa nasud, nasakitan gyud siya sa dihang nasayran niya ang maong panghitabo. “Ang pagposas nila ni Collin, sama ra sab nga giposasan ko,” padayag pa ni Rama.
Human gipahigayon ang press conference ni Rama, adunay mga gipakatap nga kapulisan gawas sa City Hall aron masiguro ang lugar taliwa sa posibilidad sa mga posibleng protesta sa kampo ni Rama nga nagtinguha nga mobalik sa city hall. (BANAT NEWS)