P7.1M shabu nasakmit

CEBU, Philippines — Niabot og P7.1 milyones nga balor sa illegal nga drugas ang nasakmit sa mga operatiba sa Provincial Intelligence Unit/Police Drug Enforcement Unit sa Cebu Police Provincial Office(CPPO) atol sa buy-bust operation sa Purok Sunflower, Barangay San Roque, Dakbayan sa Talisay, kagahapon sa kaadlawon.

Ang maong operasyon niresulta sa pagkasikop ni Urbanito Dizon Degamo Daan, 31, dunay kaipon ug nagpuyo sa Barangay San Roque, Talisay City.

Nasakmit gikan sa suspetsado ang 1,050 grams nga shabu nga nagkantidad og P7.1 million. 

Ang suspetsado niangkon nga sa iyahang maguwang nga napriso sa Abuyog Penal Farm sa Leyte ang mga shabu nga nakuha gikan niya.

Giingong mo-message niya ang iyahang maguwang nga dunay supply sa illegal nga drugas nga ipadala sa Sugbo ug siya'y mokuha.

Misaad matod pa iyahang igsuon nga kun ma dispose ang drugas siya'y mogasto sa birthday sa iyahang anak.

"Mo-chat na akung maguwang sir nga naay moabot nga supply sa illegal drugs nya iyang gipalig nako nga siya ang mo gasto sa birthday sa akung anak, mao to ni sugot nalang pud ko," sigon sa suspetsado.

Dili kini ang unang higayon nga gipadalhan siya og drugas, ang unang pagpadala nahitabo adtong Marso 2024 diin iyahang nahatud sa downline bugti sa suhol nga P20, 000.

Taud-taod na nga nadakpan sa kapulisan sa Central Visayas ang maguwang sa suspetsado.  Sa impormasyon sa kapulisan giingong bodegero ang dinakpan .

Gipaubos ang suspek og duha ka semana nga monitoring ug matod pa maka dispose ang dinakpan og 500 grams nga shabu kada semana ug dili lang Talisay City ang area of operation apan apil na ang mga silingan nga lugar.

I-verify sa kapulisan ang impormasyon nga gitug-an sa suspetsado mahitungod sa maguwang niini.

Kasong kalapasan sa Section 5 ug 11, Article II sa Republic Act 9165 ang ipasaka batok sa suspect. (BANAT NEWS)