CEBU, Philippines — Wala nay kinabuhi nga napalgan ang usa ka 45-anyos nga lalake nga gituohang nalumos diha sa Guadalupe River, Barangay Capitol Site, siyudad sa Sugbo kagahapon sa buntag.
Ang namatay giila nga si Woody Tampus Soringa, minyo, 45, ug nagpuyo sa naasoy nga dapit. Nakadawat og tawag ang kapulisan sa Abellana Police Station 2 Cebu City Police Office (CCPO) mahitungod sa nakit-an nga patay'ng lawas sa tawo ug dali nila kining gi respondehan.
Ang patay'ng lawas sa biktima nakit-an sa sapa nga nahimutang gawas ra sa ilang panimalay.
Base sa inisyal nga imbestigasyon sa kapulisan alas 12 sa tungang gabie kagahapon katapusan kining nakit-ang buhi.
Nag-inom kini kuyog iyahang mga hilga nga sila si Vicente Gilbuena Impas ug Marcial Baylan ug nipauli.
Pagka alas 5:30 sa buntag kagahapon usa ka concerned citizen nga naila sa ngalan nga Raymond Bacalso, taga Sitio Sta. Lucia, Barangay Guadalupe maoy nakakita sa patay'ng lawas.
Dali kining nanawag og police ug nagpahibawo labot sa hitabo, pag-abot sa mga polis patay na kini.
Dunay nga samad ang likod nga bahin sa lawas ug ang karsones niini naa na sa ubos ug ang ulo naa na sa ilawom sa tubig sapa.
Nasayran sa imbestigasyon nga unom ka litrong ilimnong makahubog ang nahurot sa managhigala anang gabii.
Gituohan nga nagtubag kini sugo sa lawas sa ngilit nga dapit sa ilang balay apan aksidente kining natagak sa sapa ug nawagtangag panimuot hangtud nalumos. (BANAT NEWS)