AKAP, AICS wala gamita sa vote buying — DSWD

CEBU, Philippines — Gipadaplin sa kalihim sa Department of Social Welfare and Development (DSWD) ang mga alegasyon nga gigamit ang programang Assistance to Individuals in Crisis Situation (AICS) ug Ayuda para sa Kapos ang Kita Program (AKAP), alang sa politikanhong katuyoan, lakip ang “vote buying.”

Nakanayon si DSWD Secretary Rex Gatchalian nga ang mga Field Offices sa DSWD sa tibuok nasud nagserbisyo sa mga walk-in nga kliyente ug mga gi-refer nga indibidwal gikan sa LGU, nagproseso sa mga aplikasyon ug nag-apod-apod og tabang pinaagi sa AICS ug AKAP sa mga kwalipikadong benepisaryo.

“Let me reiterate that all the DSWD’s Field Offices across the country serve people in need, whether they are walk-in clients or were referred to by local government unit (LGU) officials. The DSWD continues to process applications and distribute assistance through AICS and AKAP to qualified beneficiaries,” saysay ni Gatchalian sumala sa taho sa press release sa DSWD.

Matud niya nga ang DSWD nagpatuman og hugot nga proseso sa beripikasyon ug ebalwasyon pinaagi sa mga lisensyadong social worker aron malikayan ang overlapping sa hinabang sa ubang programa sa DSWD, bisan sa mga referral gikan sa mga mambabalaod ug opisyal sa LGU.

Samtang ang DSWD aktibong nakig-alayon sa mga LGU executives ug mga opisyal sa pag-organisar sa payout, ang pondo alang sa AKAP ug AICS nagagikan sa budget sa ahensya nga gihatag ubos sa General Appropriations Act o GAA.

Sa ubang bahin si Gatchalian nipasalig sa publiko nga ang duha ka programa nakabenepisyo sa daghang kabus nga mga Pilipino.

Gikan Enero hangtud Disyembre 2023, ang DSWD nakahatag og Php40.9 bilyones nga tabang sa kapin sa 6.5 milyong mga Pilipino nga nag-atubang og kalisdanan pinaagi sa AICS program, nga nagrepresentar sa 98.5 porsyento nga nagamit sa kinatibuk-ang pondo nga kapin sa Php41.5              bilyon.

Sa samang tuig, kaupaton sa target niini nga 1.69 ka milyong benepisyaryo ang  naserbisyohan ubos sa AICS, nga nanginahanglan og tabang alang sa transportasyon, medikal, paglubong, edukasyon, pagkaon, ug uban pang serbisyo.

Sa laing bahin, kapin sa 4 milyones ka ‘near poor’ Filipinos ang nakabenepisyo sa AKAP atol sa unang tuig sa pagpatuman niini gikan sa Enero hangtod Oktubre 2024, kon diin 77.57 porsyento o PHP 20.7 bilyon na ang nagamit sa tibuok pondo nga Php26.7 bilyon.

Apan, sumala sa news article sa Philstar.com, si House of Representatives, Sen. Imee Marcos mikompirmar nga gitangtang sa Senado ang P39.8-bilyones nga alokasyon alang sa AKAP gikan sa PHP6.352 trilyones nga national budget alang sa 2025.

Hinuon, iyang gisugyot nga iusa nalang ang AICS ug AKAP isip usa ka standby fund alang niadtong nanginahanglan.  IBM BANAT NEWS