Mandaue City mihakot og pasidungog sa Local Health System Awards

CEBU, Philippines — Gihakot sa dakbayan sa Mandaue ang nagkadaiyang pasidungog sa 2024 Local Health System Awards nga gipahigayon sa Bai Hotel niadtong Biyernes, Nobiyembre 22, 2024.

Naangkon ang maong mga pasidungog ubos sa liderato ni Mandaue City Mayor Glenn Bercede nga iyang nasunod sa liderato ni mayor Jonas Cortes kauban ang mga opisyales sa kagamhanan sa dakbayan nga nagpakabana alang sa kaayohan sa mga Mandauehanon.

Ang mga nahakot awards sa Mandaue City mao ang naglakip sa Good Practices in Health Award, Highest Number of Accredited Konsulta, Provider-City-Wide Health Systems Category, Excellence Award on Newborn Screening, Award for Highest in Population Chest X-Ray Screening sa mga Highly Urbanized Cities, Award for Establishment of the Health Care Provider Network, Nominee of Highly Urbanized City Category, Emilio Aguinaldo Dugong Bayani Award, Bronze Awardee for TB Case Notification Rate, Top 3 ang Mandaue City sa Health Facility with Highest HIV Testing.

Dugang pa niini ang siyudad sa Mandaue nakadawat usab og Certificate of Appreciation on Newborn Screening (NBS).

Ang 2024 Local Health System Awards gi-representahan sa mga opisyales gikan sa nagkadaiyang lugar sa Region 7.

Sa Mandaue City si City Councilor Cynthia Cinco-Remedio ug Mandaue City Health OIC Dr. Debra Maria Catulong ang nangulo sa delegasyon.  MEL BANAT NEWS