Cash aid sa mga seniors ihatag karong Disyembre 7  

CEBU, Philippines — Sigurado nga merry ang pasko sa mga senior citizens nonot sa pahibalo ni Mayor Raymond Alvin Garcia sa Dakbayan sa Sugbo nga ipanghatag na ang ilang financial assistance sa unang semana sa December.

Gipahibalo ni Garcia ang pag-apod-apod sa Financial assistance sa senior citizens sa December 7, 2024.

Mao kini ang ikaupat nga kwarter sa pagpang-apod-apod sa mga financial assistance sa mga senior citizens nga tag P3mil matag tulo ka buwan.

Sa pagka karon ang siyudad adunay dili mominos sa 90mil ka mga senior citizens nga naka avail sa financial assistance nga gihatag sa siyudad.

Ang maong pahibalo sa mayor gihangop sa mga senior ilabi na kay aduna silay magamit sa pagpamalit sa ilang maintenance nga tambal.

Samtang sa laing bahin sa padayon nga pagsuporta sa katigulangan sa Central Visayas, ang Department of Social Welfare and Development (DSWD)-7 nakaabot na sa 95.26 porsyento sa mga benepisyaryo nga nakadawat sa social pension.

Ang datos gikan sa DSWD-7 nagpakita nga 285,521 gikan sa 299,737 sa rehiyon ang nakadawat na og "cash stipends" sa ikatulong kwarter sa  2024.

Ang mga indigent nga senior citizens adunay social pension nga P1,000 matag bulan aron matabangan sila sa ilang panginahanglanon, nga karon nagtotal na og Php 9,000 alang niini nga kwarter.

Kini nga social pension magamit lamang sa mga tigulang nga masakiton ug kadtong "wala makadawat og pensyon o regular nga suporta gikan sa ilang mga pamilya."

Si DSWD-7 regional director Shalaine Marie S. Lucero mipasidaan sa mga local government units (LGUs) nga maghimo sa ilang kaugalingong programa aron ang ubang mga tigulang makabenepisyo usab gikan sa ingon nga mga programa.

Matud pa ni Lucero, daghan pa ang mga senior citizen, labi na kadtong naa sa mga kabukiran, nga wala pa maapil sa social pension program tungod sa limitado nga gidaghanon sa mga slot.

Si Lucero mipadayag nga ipadayon nila ang pagsuporta sa kaayohan sa mga senior citizens ug magpursige alang sa dugang badyet aron mapalapdan ang mga benepisyo nga mahatag sa departamento.

Kini nga inisiyatiba nagpalig-on sa duha ka mga programa nga nagsuporta sa mga senior citizen nga mao ang; Social Pension Program ug Republic Act 10868 o Centenarian Act of 2016.

Dugang pa, 90 ka mga centenarian ang gihatagan na og P100,000 nga kwarta uban sa usa ka sulat sa pag-congratulate gikan kang Presidente Ferdinand "Bongbong" R. Marcos Jr. aron pasidunggan ang ilang kinabuhi ug kontribusyon sa nasud.

Sukad nga gipasa ang balaod niadtong 2016, ang DSWD-7 nakahatag og cash gifts sa 982 ka sentenaryo sa rehiyon.

Sa 2025, ang pagpatuman sa RA 10868 kay hingpit nga ibalhin ngadto sa National Commission of Senior Citizens.  MEL BANAT NEWS