CEBU, Philippines — Makasugod na og tukod og bag-ong edipisyo ang Cebu Normal University (CNU) alang sa College of Medicine niini human nga nitugot ang Probinsiya sa Sugbo nga gamiton ang luna sa CNU diha sa Barangay Sambag II, Dakbayan sa Sugbo.
Usa ka usufruct agreement ang gipirmahan ni Gobernador Gwendolyn Garcia ug CNU President Dr. Daniel Ariaso, Sr. alang sa pagpagamit sa Kapitolyo sa Lot. 519-A nga adunay sukod nga 1,450 metro kwadrado alang sa pagtukod sa CNU-VSMMC College of Medicine.
Sa maong kasabotan, magamit sa CNU ang maong luna sulod sa 25 ka tuig alang sa ilang labing una nga state-funded medical school sa Central Visayas.
Si Ariaso nagkanayon nga pangandoy sa ilang eskwelahan ang pagpagpalapad sa ilang College of Medicine.
“We have been dreaming this for the last how many years, and then we want to give also a modest and world-class building for our students under the medical courses and health sciences”, matud ni Ariaso.
Matud ni Ariaso nga ilang paspasan ang pagtukod sa maong building nga adunay insiyal nga pundo nga P120 milyones.
Aduna nay desinyo sa maong edipisyo sa maong medical school building nga langkuban sa 21 ka andana diin ibutang usab ang college of nursing aron mausa ra sa usa ka edipisyo ang tanang medical courses sa unibersidad.
Si Gobernador Gwendolyn Garcia nagkanayon nga ang maong luna naapill sa nahitabong devolution kaniadto diin ang mga personnel, kabatangan ug uban pa gikan sa national government agencies gi-turnover ngadto sa mga local government unit.
“Because of that law, then-President Corazon Aquino signed an EO that further enjoined all departments and national government agencies to turn over to the local government unit the relevant person, property, and other assets as well as liability. This land, this lot, is one of those”, padayag ni Garcia.
Ang sestema sa CNU-VSMMC College of Medicine susama sa SA University of the Philippines-Philippine General Hospital (UP-PGH), usa ka tertiary state-owned nga tambalanan nga gidumala sa University of the Philippines. BDB BANAT NEWS