CEBU, Philippines — Gumikan sa utang nga wala gibayran gipusil sa 18-anyos nga lalake ang nangutang niya nga 45-anyos nga lalake niadtong Domingo sa gabii, Nobiyembre 17, 2024 sa Sitio Paradise 2, Barangay Kinasang-an, siyudad sa Sugbo.
Ang biktima mao si Renante Alforque Paradero, samtang ang suspek mao si alyas Clint, 18 anyos, ang duha pulos nagpuyo sa lugar.
Sa impormasyon sa Inayawan Police Station 7 Cebu City Police Office (CCPO) nga niadto sa police station ang igsuon sa biktima ug ni-report labot sa nahitabong pagpamusil sa dapit.
Girespondehan kini sa kapulisan ug sa ilang pag-abot nakit-an ang biktima nga naligo na sa kaugalingong dugo ug dunay samad pinusilan sa agtang.
Nasayran nga dunay nakakita sa suspek nga maoy naghimo sa krimen sanglit sa wala pa nahitabo ang pagpamusil giingong nagkalalis ang duha. Nasuko matud pa ang suspek nga wala bayri sa biktima ang giutang niini nga P400.
Nakadaog ang biktima sa online gambling nga scatter apan niuli matod pa kini sa probinsya ug nahurot ang daog dihang gipaningil sa suspek wala nay kwarta ikabayad kay nahurot. Gikataho ngagibaharan sa suspek ang biktima nga iyaha kining balikon.
Ang suspek wala'y rekord sa Police Station 7 samtang ang biktima kaduha na nadakpan sa kasong kalambigitan sa ilegal nga drugas niadtong 2022 ug 2023.
Gipalawman karon sa kapulisan ang ilang imbestigasyon ug usa sab sa ilang gisubay ang posibilidad nga may kalambigitan sa ilegal nga drugas ang maong hitabo.
"Based on our investigation tapos natanong din natin ‘yung mga kapitbahay na involved din talaga ang dalawang ito," matud ni Basitao. (BANAT NEWS)