Duha natabunan og abog patay

CEBU, Philippines — Duha ka trabahante og usa ka kompanya sa semento sa Lungsod sa San Fernando, Probinsya sa Sugbo ang nakalas human sila natabunan og raw materials samtang galimpyo sa cement mill kagahapon sa buntag, Nobiyembre 18, 2024.

Ang usa sa duha mao ang kapatas ug parehong residente sa maong lungsod apan wala mohatag og pangalan ang kapolisan sa ilang mga pangalan.

Nagkanayon si Police Major Jan Christian Bautista, hepe sa San Fernando Municipal Police Station ang duha nanglimpyo sa cement mill niadtong tungora sa dihang nahitabo ang aksidente.

Sumala pa nga nisulod ang duha sa dust collector aron unta ipasuyop sa vacuum machine ang mga baga na kaayong natigom nga abog gikan sa ilang raw materials nga gamiton paghimo og semento.

Apan samtang nagpasuyop sa mga nakabarang abog, giingong kalit lang nga nahugno ang baga na kaayong abog sa sud sa dust collector ug natabunan silang duha.

Daling gidala sa Carcar District Hospital ang duha apan ang foreman gideklarar nga dead-on-arrival samtang ang sakop niini gitabang pa apan nakasab-an gihapon sa kinabuhi.

Matud pa sa kapolisan niduso na og incident report ang kompaniya  ngadto sa Department of Labor and Employment (DOLE) ug dunay imbestigasyon nga himoon.

Sa habig sab sa kapulisan, susihon nila kun duna bay manubag sa maong hitabo. Wala sab mahisguti sa kapolisan kun aduna bay safety officer nga nagbantay kanila samtang naghimo sa ilang trabaho anang mga orasa.

"I -check pa rin ng PNP kung may liable ba doon sa (nangyari)," dugang ni Bautista.

Andam matod pa mohatag og tabang ang kompaniya sa nabiyaang pamilya sa mga biktima. (BANAT NEWS)