911 hotline maoy ipagamit

CEBU, Philippines — Gimandoan sa Cebu City Council ang Disaster Risk Reduction and Management Office (DRRMO) sa pag-edukar sa publiko kun unsaon paggamit ang response protocols ug paggamit sa emergency hotlines.

Sa mga resolusyon ni Konsehal Rey Gealon nga giaprobahan sa konseho atol sa regular session niadtong Miyerkules, ang CDRRMO gimandoan nga mohimo og massive information, education, ug communication campaign aron mapalig-on ang paghatag og gibug-aton sa evacuation ug kaandam sa panahon sa kalamidad sa nagkadaiyang barangay sa dakbayan.

Gihatagan usab nila og gibug-aton ang kamahinungdanon niini nga kampanya ug sa paghatag og priority sa mga lugar nga daling bahaon. Subay niini, ang konseho nangayo ug detalyadong report sa maong hangyo nga isumiter sulod sa 15 ka adlaw. Gawas niini, naghangyo usab ang konseho sa CDRRMO nga mohimo pa og education campaign sa paggamit sa emergency hotline.

Gimandoan usab nila ang susamang opisina nga hunongon ang pag-post sa ubang mga emergency numbers sa bisan asa nga platform aron ma-centralized ang mga emergency calls sa dakbayan.

Bag-ohay lang gilusad sa Cebu City Government ang 911 Emergency Command Center niadtong Septiyembre 30, 2024.

Dugang pa, ang tanang tawag sa 911 hotline libre ug andam na pagdawat sa mga tawag, nga pagadumalahon sa CCDRRMO. Sa giaprobahan nga resolusyon sa konseho, ang CCDRRMO Communications Section giingong nipaubos na sa pagbansay-bansay sa "911 Emergency Telecommunicators Capacity Building" nga gipahigayon sa Department of Interior and Local Government (DILG).

Sukad niadto, gilusad na ang 911 Emergency Command Center ug andam na nga modawat og mga tawag apan miingon ang konseho nga dili tanang Sugbuanon ang nakahibaw sa availability sa paggamit niini.

Giaprobahan usab sa konseho sa siyudad ang laing resolusyon ni Gealon nga nangayo ug detalyadong evacuation protocol kung adunay kusog nga pag-ulan ug pagbaha gikan sa CRDDMO.

Nangayo sab sila og lista sa mga lugar nga kanunay gibahaan sulod sa siyudad.

Kini nga mga aksyon naggumikan sa usa ka assessment nga ang Pilipinas "highly vulnerable sa natural nga mga kalamidad" ilabi na sa pagbaha.

Uyon ang konseho nga dako kini og hulga sa kinabuhi ug kabtangan ilabina niadtong anaa sa mga dapit nga daling mabahaan. (BANAT NEWS)