CEBU, Philippines — Patay ang usa ka drayber sa motorsiklo nga wala magsuot og helmet samtang samdan ang iyang angkas human sila nabangga sa poste diha dapit sa gate sa usa ka subdivision sa Barangay Lawaan 1, Dakbayan sa Talisay niadtong Huwebes sa buntag.
Ang namatay nga drayber mao si Bryan Campo, 47, taga Barangay Dumlog samtang ang iyang angkas mao si Giory Baclay, 50, taga Barangay Maghaway sa maong siyudad.
Matud pa ni Jonathan Tumulak, pangu sa City of Talisay-Traffic Operation Development Authority (CT-TODA) dali nga miresponde iyang sakop sa dapit ug nakita ang mga biktima nga nipilit sa poste.
Nahibaw-an nga gikan sa Barangay Maghaway ang mga biktima ug paingon unta sila sa Barangay Dumlog.
Ang mga nakasaksi sa dapit nihulagway nga kusog nga nagdagan ang motorsiklo kay dulhogon ang karsada apan nadiretso kini ogbangga sa poste.
Nagkanayon si Tumulak nga self-accident ang nahitabo. Ang drayber patay samtang gidala sa tambalanan ang angkas niini. Nahibaw-sab nga wala mag-helmet ang drayber sa motorsiklo. IBM BANAT NEWS