Seguridad sa ASEAN chief justices gipangandaman

CEBU, Philippines — Gipangandaman na sa kapolisan sa Police Regional Office-7 ang pagpangabot sa mga chief justices sa nagkalain-laing mga nasud nga miyembro sa Association of Southeast Asian Nations (ASEAN) nga mangabot sa Cebu alang sa ilang summit.

Ang Lapu-Lapu City,  Cebu City Police Office(CCPO) ug ang Regional Highway Patrol Group(RHPG)-7 nangandam sa maong upat ka adlaw nga 11th  Council of the Association of Southeast Asian Nations Chief Justices (CACJ) diin ang Supreme Court maoy host.

Magsugod kini karong  Nobiyembre 18, 2024 ug matapos sa Nobiyembre 21, 2024 diin sagad sa ilang mga kalihukan sa dakbayan sa Lapu-Lapu himoon ug duna say sa Cebu City.

 Gipaabot nga mangabot dinhi ang mga pangulo sa judiciaries ug senior judiciary officials gikan sa Brunei Darussalam, Cambodia, Indonesia, Lao PDR, Malaysia, Myanmar, Philippines, Singapore, Thailand, ug Vietnam.

Ang meeting mo-assess sa kalambuan nga nahimo sa mga nanglabay nga katuigan aron mas palig-onon ang rule of law sa ASEAN region pinaagi sa cooperation ug capacity building tali sa member nations.  Ang RHPG-7 nihimo og simulation exercises alang sa seguridad nga ipatuman sa pag-abot sa mga foreign chief justices ingon man ang pag-adto sa uban sa usa ka venue sa Cebu City.

Matud ni Police Lieutenant Colonel Wilbert Parilla, Regional Chief sa HPG-7 nga gipangandaman nila nga hapsay ang pagbiyahe sa mga delegado gikan sa Lapu-Lapu City paingon sa Cebu City ug pabalik.

 Niabot sa 117 ka HPG personnel ang uban gikan sa Region 6 ug 8 apil na 63 ka motorsiklo ug 16 ka mobile patrol vehicles ang i-deploy sa maong kalihukan.

Samtang si Police Lieutenant Colonel Maria Theresa Macatangay, Deputy City Director for Operations ug tigpamaba sa CCPO miingon kanunay ilahang coordination meeting sa security forces uban ang mga representante sa Supreme Court.

Sa Lapu-Lapu City, ang Police Regional Office (PRO) 7 mipadala og dugang 30 ka mga polis para sa Lapulapu City Police Office isip augmentation force nga motabang sa pagbantay nga himoon sa Hoops Dome sa Barangay Gun-ob sa Siyudad  sa Lapu-Lapu.

Nasayran nga gawas sa mga ASEAN Chief Justices, magtigom sab sa siyudad ang mga kadagkoan sa ASEAN central banks.

Si Police Lt. Col. Christian Torres, tigpamaba sa LCPO miingon nga motabang usab sa pagmonitor ang intelligence units sa Philippine Air Force ug Philippine Navy sa maong kalihokan.  IBM BANAT NEWS