Nurse natumbahan og kahoy

CEBU, Philippines — Naangol ang usa ka nurse nga trabahante sa usa ka pribadong ospital human naigo sa sanga sa kahoy nga kalit natumba ug nibabag diha sa tungataunga sa dalan Don Jose Avila Street, Barangay Capitol Site, siyudad sa Sugbo kagahapon sa buntag.

Ang maong kahoy nga Neem Tree sumala pa sa nakakitang habal-habal  driver nga si Alan Empisao, 55 ,  naatol nga naglakaw sa maong dapit ang nurse padulong na unta mo-duty.

Apan kalit lang naukang ang kahoy ug natumba kini  ug naigo sa mga sanga ang aping ug bukton niini ug natumba kini.  "Murag na-shock man gani to kadiyot kay wala siya kahibawo nga dako kay kahoy natumba niya gud, mao ‘to among gipabangon, gipabarog," sigon ni Alan.

Nilagapak matud pa ang kahoy ug diretso kining natumba. Swerte sab nga niadtong mga orasa, wala pay ni-park nga mga sakyanan o motorsiklo sa lugar.

Ang mga personnel sa Barangay Capitol Site nagbantay sa dagan sa trapiko sa dapit sanglit dili pa maagian.

Nagtinabangay sab sila sa mga personnel Cebu City Disaster Risk Reduction and Management Office (CCDRRMO) sa pagputol sa kahoy aron dili na mababagan ang dalan.  IBM BANAT NEWS