CEBU, Philippines — Pito ka balay ang naugdaw ug duha ang partially damage sa nahitabong sunog sa Purok Magtalisay, Sitio Sangi sa Barangay Alegria, Lungsod sa Cordova kagahapon sa kadlawon.
Si Cordova Municipal Fire Marshall Senior Inspector Mario Randy Cuizon nagkanayon nga ilang nadawat ang taho pinaagi sa pagpakitabang sa usa ka concerned citizen nga nagpuyo sa maong dapit .
Matud ni Cuizon nga hingpit nilang napalong ang kayo pasado alas 2:00 sa kadlawon ang takna.
Ang kabomberohan sa lungsod mopahigayon og dugang imbestigasyon sa maong insidente diin gituohang ang gidagkotang kandila nga napasagdan ug natumba giingong hinungdan sa maong sunog.
Si Mayor Cesar “Didoy” Suan nimando kang Konsehal Lemuel Pogoy kinsa mao usab ang Committee Chairman sa Disaster Risk Reduction Preparedness and Management sa pagsusi sa kahimtang sa mga nasunogan.
Samtang ang MDRRMO pinangulohan ni Fred Anlocotan nagkanayon nga himuong temporaryong shelter ang Gabi Evacuation Center.
Gisiguro usab nila nga adunay pagkaon ug komportable ang kahimtang sa mga biktima nga mga pamilya.
Sa iyang bahin, si Suan nagkanayon nga andam ang kagamhanan sa lungsod sa paghatag og relief goods ug cash assistance.
Nasayran nga ang mga panimalay nga nasunog pulos mga ginama sa light materials ug nagsikit-siikt apan dali kining napawong sa mga bombero diin gipaubos kini sa second alarm. BDB BANAT NEWS