Lalaki gireklamo og sextortion sikop sa entrapment

CEBU, Philippines — Usa ka 37-anyos nga lalaki ang gidakop sa entrapment operation human kini gireklamo og sextortion sa usa ka 14-anyos nga batang babaye niadtong Martes, Nobiyembre 12, 2024 sa usa ka lodging house sa Purok Jaguar, Barangay Panadtaran, Lungsod sa San Fernando.

Ang suspetsado mao si alyas “Nada”, usa ka construction worker, taga Barangay South Poblacion, Lungsod sa San Fernando.

Ang biktima usa ka 14-anyos nga babaye, grade 9 student, taga Siyudad sa Naga.

Base sa imbestigasyon sa kapolisan sa Dakbayan sa Naga nga ang biktima nangayo og tabang human giingong gi-blackmail sa suspect nga ipakatap ang iyang law-ay nga videos kon dili kini mosugot nga makig-sex sa suspect.

 Ang Women and Children Protection Desk sa City of Naga Police Station nihimo og entrapment operation ug nasikop ang suspetsado.

Giingong ang biktima ug suspetsado nagkaila diha sa Facebook niadtong Septiyembre 5, 2024 human ang suspetsado nag-send og friend request gamit ang account nga ang ngalan kay babaye.

Nag-chat ang duha pinaagi sa messenger hangtud nga nag-video call sex sila.

Apan giingong ang suspetsdo ni-record sa video call sex nga walay pagtugot sa biktima.

Human niini, ang suspetsado gusto nga makigkita sa biktima ug makighilawas ug gihulga ang biktima nga kong dili mosugot ipakatap ang law-ay nga videos.

Atol sa entrapment operation ang suspetsado ug biktima nagkita sa lodging house sa San Fernando ug didto gidakop ang suspect.

Base sa interview sa DYSS Super Radyo Cebu ang suspetsado nihimakak nga kaila siya sa biktima ug sa ilang komunikasyon diha sa Facebook.

Matud sa suspetsado nga usa ka "Claire" kinsa nailaila niya sa Facebook ang ni-refer sa biktima ngadto kaniya diin bugti sa P1,000 mag-sex sila.

Sa "Cebu Meet-Up" group giingong naila-ila sa suspek ang ginganlan og "Claire" nga usa ka lalaki.

Ang suspetsado nangangkon nga niuyon siya sa sabot ug nibayad sa kantidad tungod kay naglikay kini nga madugangan ang ilahang anak sa iyahang asawa nga unom kabuok na.

Giingong gimandoan ang suspek nga pakigkitaan ang biktima gawas sa lodging house.

"Ako siya’ng giingnan, dai ikaw diay dai? Bataa pa nimo uy, dili ko madiskwedo nimo? nitubag siya nga sex raman kaha imong tuyo kuya?", pangangkon sa suspek.

Ug nahibong siya nganong gustong ipa-delete sa biktima ang law-ay nga video nga unang higayon pa man nga nagkita sila.

Gani nakonsensiya siya ug dili na unta idayon ang plano apan giingong kalit lang niabot ang mga polis ug gidakop siya.

Na-recover usab sa kapolisan gikan sa suspetsado ang kalibre .45 nga pistola nga adunay mga buhing bala.   BDB BANAT NEWS