CEBU, Philippines — Giabagan na sa Department of Social Welfare and Services nga maoperahan ang 10 anyos nga bata nga natuhog ang mata sa kabilya diha sa Sitio Sto. Niño, Barangay Apas, siyudad sa Sugbo niadtong Martes sa buntag, Nobiyembre 12, 2024.
Suma pa ni Portia Basmayor ang pangulo sa DSWS nga nakig-alayon na sila ug si Konsehal Joel Garganera ngadto kang Dr. Gerardo Aquino sa Vicente Sotto Memorial Medical Center nga ma-priority ang bata sa pagpa-opera.
Aduna na usab silay social worker nga gipadala sa tambalanan aron moasistar nga mapaubos sa Malasakit program ug aron way bayranan ang pag-opera sa bata.
Gitug-an ni Basmayor, nihatag usab sila ug initial nga P4mil nga financial assistance aron adunay magamit ang pamilya sa palitonon nga mga tambal nga wala sa tambalanan.
Pakigtagbuan usab sa DSWS ang tag-iya sa kabilya alang sa posibleng paghatag usab og assistance sa bata.
Segun pa usab ni Basmayor nga wa dayon maoperahi ang bata tungod kay duna pay mas nauna nga nagkinahanglan usab og dinalian nga operasyon.
Samtang ang maguwang sa bata naghangyo nga matabangan ang ilang manghud tungod sa gidangatan niini.
Si Alma, 23 anyos, maguwang sa bata misaysay nga grabe kasakit ang gibati sa iyahang manghod ug mangping-it kini kun matarog lang gamay.
Nasayran nga 13 sila ka magsuon diin namatyan og usa ug ika-walo ang 10-anyos nga bata samtang ang ilang inahan tua sa Leyte. MEL BANAT NEWS