CEBU, Philippines — Giklaro ni Konsehal Jocelyn Pesquera nga dili libre ang relocation site nga ihatag sa gobyerno ngadto sa mawad-an og mga panimalay sama sa malakip sa demolisyon.
“Ang relocation, dili na free, bayaranan na ninyo”, paghimug-at ni Pesquera.
Nahisgutan kini atol sa Executive Session kagahapon human nga nidangop ang mga residente sa North Reclamation Area ngadto sa konseho sa Dakbayan sa Sugbo ug naghangyo nga hatagan sila og relocation site kun i-demolish ang ilang mga balay nga anaa natukod sa danger zone.
Ang usa sa mga residente nga si Rosanna Siglos nagkanayon nga sa gidugayon sa ilang pagpuyo sa NRA, niadtong Hulyo lang niining tuiga nga nakadawat sila og notisya gikan sa Prevention Restoration Order Beautification Enhancement (PROBE) nga magpahigayon og clearing operation apan ang nahitabo niadtong Agosto, giguba ang parte sa pipila ka mga panimalay nga nakabalda na sa kadalanan.
Misaysay sab ang pangu sa Federation NRA Lorena Alquizola nga sayod gyud sila nga sa dili madugay i-demolish gyud ang ilang gitukod nga mga panimalay tungod kay ang yuta nga ilang gigamit iya man kini sa gobyerno.
Hangyo nila nga kung mahatagan man sila og relocation site, kadto lang dili layo sa ilang mga panginabuhian dinhi sa sentro sa syudad ug dili lang sila magpahimutang sa bukid.
“Dili man gyud mi tutol sa demolisyon pero relocation lang gyud ang among pangayo. Kung naa man gani relocation, kana lang pud nga dili sa bungtod gyud ba. Mag-unsa nalang mi nga nanginabuhi naa gyud sa siyudad. Lisod kaayo sa among mga estudyante pag-adjust”, esplikar ni Alquizola. Mipasabot si Pesquera nga mamahimo gyud kini nga mahatagan sa pagtugot kung asa kini nga buot nga magpa-relocate apan ang pangutana ni Pesquera kanila, “ka-afford ba mo?”
Bisan og unhan og bayad sa gobyerno aron nga mamahimong relocation site, wala gihapon kini nagpasabot nga dili na mobayad ang magpa-relocate sa gobyerno. MEL BANAT NEWS