CEBU, Philippines — Ang kagamhanan sa Dakbayan sa Sugbo nag-umol og special task force aron nga maoy eksklusibong modumala sa dagan sa trapiko diha sa South Road Properties (SRP) kong mahimo na kining “discipline zone” nga magsugod sa Enero 2025.
Ang maong task force namugna kini pinaagi sa pagpaningkamot ni Konsehal Rey Gealon ug Mayor Raymond Alvin Garcia.
Si Gealon mao ang gitudlo ni Garcia isip chairman sa SRP Board.
Ang maong special task force gitawag kini sa Cebu City Transportation Office (CCTO) og “SRP Patrol Group”.
Langkuban kini sa mga karaan ug bag-ong CCTO personnel gikan sa SRP Board ug ubang buhatan sa city hall.
Si Jounald Bautista, assistant operations head sa CCTO nagkanayon atol sa pagpakighinabi sa CCTO’s Traffic Hour teleradyo program pinaagi sa Sugboanon Channel nga ang SRP Patrol Group maoy motabang sa trabahuon sa CCTO sa SRP ilabi na nga daghang negosyo ang gilaomang mosulbong sa maong lugar sa sunod tuig. Gipanglantawan ni Bautista nga mas modaghan pa ang mga sakyanan nga moagi sa SRP tungod kay mopahigayon ang SM Seaside Arena sa ilang soft opening sunod tuig mao nga giandam na nila ang task force.
Usa sa dakong tulumanon sa task force mao ang pagsiguro nga mapatuman ang mga balaod trapiko diha sa SRP sama sa pagpatuman sa speed limit, pagtangtang sa mga obstruction sa trapiko ug pagdumala sa trapiko sa Cebu South Coastal Road. (BANAT NEWS)