CEBU, Philippines — Liboan ka magtutuo ang nisaksi sa fluvial procession sa pagbukas sa misa novena sa kapistahan sa Birhen sa Regla.
Gisugdan ang maong kalihokan sa usa ka Santos nga Misa diha sa Parokya sa Our Lady of the Sacred Heart Parish Marigondon human niini gisunod ang pagdala sa imahen sa Birhen sa Regla sa Roro Port sa Lungsod sa Cordova diin gisugat kini sa opisyales sa lungsod nga gipangulohan ni Mayor Cesar "Didoy" Suan.
Adunay mga nagpahigayon og halad sayaw atol sa pag-abot sa imahen sa Birhen.
Matud ni Suan nga mapasalamaton siya nga giapil sila sa grasya nga malakip sa masuroyan sa Birhen sa Regla diin diha nigikan sa ilang lungsod una nibalik ngadto sa parokya sa Nuestra Señora de Regla Parish.
Gibutyag ni Suan nga kagahapon maoy ikatulong higayon nga niagi sa ilang lungsod ang pagpagikan sa fluvial procession ug wala na usab nila gipaapil pagpaatang ang mga tinun-an ug magtutudlo bisan sa ilang kagustohan tungod kay adunay klase.
Padayon ang pag-awhag ni Suan sa katawhan nga padayon lang sa pag-ampo ug pagsalig sa Mahal nga Birhen alang sa mga grasya nga padayon nga gibubo.
Gipasakay usab sa opisyales sa Cordova ang Birhen sa MV Mica8 nga iya sa Jomalia Shipping kinsa maoy gigamit isip galleon.
Ang kura paruko sa Nuestra Señora de Regla Parish National Shrine Reverend Father Benido Tumol, MSC nibutyag nga grabe ang bagang duot sa mga tawo nga iyang nakita nga nikuyog sa prosisyon ug nagpaabot sa simbahan.
Samtang si Cebu Archbishop Jose Palma mapasamaton sa tanang magtutuo nga niapil sa mga kalihokan og padayon sa pagdebosyon sa Mahal nga Birhen.
Nitambong sa Santos nga Misa sila si Mayor Junard “Ahong” Chan, Kongresista Cindi King Chan ug opisyales sa Dakbayan sa Lapu-Lapu.
Si Chan niawhag nga ipadayon ang lig-on nga pagtuo, pag-ampo ug pagpasalamat sa Mahal nga Birhen sa kanunay nga grasya, gugma, ug pag-amoma. (BANAT NEWS)